Изет Меџити преку својот ФБ профил го извести претседателот на Собранието Талат Џафери дека се повлекува од позицијата координатор на пратеничката група на ДУИ.
Дозволете ми, како координатор на пратеничката група на Демократската унија за интеграција, напиша на неговиот ФБ профил Меџити, да изразам искрени честитки за вашата повеќе од конструктивна улога и вашата неприкосновена посветеност, што секогаш резултираше со ефикасност во работата на највисокото законодавно тело на РСМ и придонесе за дополнителни демократски вредности во домот на демократијата.
– Инаку, таа, демократијата, секогаш не само што дозволува, туку и ја промовира и иницира дебатата, а со тоа и различното мислење, не само во општеството и во храмот на демократијата, републичкиот Парламент, туку дури и во рамките на еден политички субјект. Јас, во текот на овие 20 години активен политички живот, секогаш докажував дека сум приврзаник и бранител, без никакво двоумење во себе, на двата главни принципи на демократијата: гласот на слободната мисла и силата на гласот на мнозинството на гласачкото тело – напиша Меџити.
Тој додаде дека различното мислење е повеќе од здраво за едно демократско општество, додека силата на гласот на мнозинството гласачи е главната одредница за концептуалноста на демократијата на сите нивоа.
– Од оваа причина, стоејќи достоинствено зад овие принципи, останувајќи силно зад личните ставови, досега често изразени во јавноста, дека на политичкиот субјект на кој припаѓам од првите денови на неговото основање, се развиваат случувања што на никаков начин не можат да одат во прилог на најголемата политичка сила на Албанците на РСМ и што е уште поважно, ни во прилог на неприкосновениот лидер на Албанците, претседателот Али Ахмети, но и поради не создавање на забуна ниту кај еден мој колега во Собранието, а од друга страна, со намера да дадам поширок простор на мојата интенција за подостоинствена елаборација на позицијата зад која силно стојам, Ве известувам дека се повлекувам од позицијата координатор на пратеничката група на ДУИ – вели тој.
Меџити најавува дека ќе продолжи да биде, како што вели, гардиан на политиките и идеалите на претседателот Али Ахмети, како и на волјата на гласачите на ДУИ, кои во сите изборни циклуси им го дале најсилното оружје во рацете, за да го остварат тоа што го ветиле и за што се заложиле пред нив.
– Ова беше и ќе остане мој идеал, а не личните позиции и привилегии – објави на ФБ Изет Меџити.
