Шведската државна агенција за фармакологија ги истражува смртните случаи на две лица кои неодамна биле вакцинирани со вакцината на англо-шведскиот производител „AstraZeneca“ против Covid-19, пренесува во петокот Radio Sweden повикувајќи се на портпатолката на агенцијата, ден откако десетиците земји кои ја запреа привремено употребата на оваа вакцина повторно започнаа имунизацијата на населението со неа.
Во агенцијата овие случаи се сметаат како „сериозно прашање“, но треба да се истакне дека тие се ретки, изјавила портпаролката на шведскиот фармаколошки регулатор, Вероника Артурсон. Според неа, експертите треба да ја спроведат неопходната истрага и да дојдат до повеќе податоци пред да се извлечат конечните заклучоци.
„Досега не можеме ниту да ја потврдиме, ниту да ја негираме врската меѓу овие смртни случаи и вакцината“, додала Артурсон.
Радиото извести дека првиот смртен случај бил кај неодамна вакциниран пациент бил регистриран во градот Линд кон крајот на февраури. Жена на 60-годишна возраст починала на одделот за интензивна нега, а како што рекле нејзините роднини за локалните медиуми, таа била здрава но по примањето на вакцината таа започнала да развива симптоми слични на настинка.
Во петокот агенцијата извести дека регистрирала уште еден сомнителен смртен случај на пациент по вакцинирањето. Во овој случај станува збор за смрт на маж на околу 60 години, две седмици по примањето на вакцината. Пред вакцинацијата кај него биле потврдени неколку заболувања, а починал како по следица од излив на крв во мозокот.
Пред десетина дена десетина земји членки на Европската унија поради смртни случаи и појава на згрутчување на крвта и белодробна емболија привремено ја запреа употреба на вакцината на „AstraZeneca“, но по извештајот на Европската агенција за лекови (ЕМА) според кој не може категорично да се потврди поврзаноста на вакцината и споменатите случаи, од петокот повеќето земји продолжија со нејзината примена, некои со ограничувања за одредени групи од населението.
Во четвртикот шведската Агенција за јавно здравје соопшти дека сѐ уште нема да продолжи со вакцинирањето со препаратот на „AstraZeneca“ и покрај податоците од ЕМА. Претходно, имено, регулаторот во ЕУ ја потврди ефикасноста и безбедноста на вакцината „AstraZeneca“, и дека сè уште не е идентификуванодносот меѓу тромбоемболиските компликации кај вакцинираните со вакцината и квалитетот на лекот. Истовремено, ЕМА додаде дека сè уште е невозможно категорично да се исклучи таквата можна врска, и оти ќе продолжи темелното проучување на ефектот на вакцината и нејзините можни несакани ефекти.
