Кога се појави делтата сојот на коронавирусот, многумина го идентификуваа со симптомите на обичната настинка, но постои разлика.
Најчестите симптоми на ковид-19 се различни кај луѓето кои ги примиле двете дози на вакцината против коронавирусот.
Познато е дека ниту една вакцина не штити 100 проценти од инфекцијата со вирусот САРС-КоВ-2, но се покажа дека сите достапни во голем процент штитат од тешки форми на болеста предизвикани од вирусот.
Професорот Тим Спектор, епидемиолог на Кралскиот колеџ во Лондон, вели дека според студијата „ZOE Covid“, целосно вакцинираните луѓе сега сочинуваат 30% од позитивните на вирусот во Обединетото Кралство.
– Затоа е важно да се биде свесен за симптомите на ковид -19 по вакцинацијата – посочува професорот Спектор.
– Нашите податоци покажуваат дека инфекциите по вакцинацијата наликуваат на настинка, а главните симптоми се течење на носот, главоболка, кивање, болки во грлото и губење на чувството за мирис – вели тој.
Професорот Спектор ги повика британските здравствени власти да ги додадат овие симптоми на списокот за јавноста да биде информирана и луѓето што ќе ги забележат овие симптоми сами да побараат медицинска помош.
Во Обединетото Кралство, кое беше тешко погодено од голем број случаи на ковид -19 од почетокот на пандемијата, бесплатното тестирање за вирусот ковид-19 е достапно само за луѓе кои пријавуваат три симптоми – треска, кашлица и губење на сетилото на мирис и вкус.
Во апликацијата „ZOE Covid Study“, која минатата пролет откри дека губењето на чувството за мирис и вкус е еден од симптомите на инфекција со коронавирусот, Британците најчесто пријавуваат главоболки, болки во грлото и течење на носот – три симптоми кои се јавуваат во исто време.
Експертите претходно сугерираа зошто вакцинираните луѓе пријавуваат различни симптоми. Луѓето со алергии киваат бидејќи коронавирусот брзо го активира имунолошкиот систем. Затоа, се верува дека оние чиј имунолошки систем е подготвен против коронавирусот поради вакцинацијата, можат да реагираат на ист начин, со симптоми на настинка или алергија.
Кивање „без објаснување“ исто така може да биде резултат на алергија или настинка.
И покрај сето ова, се препорачува да се оди на тестирање, апелира професорот Спектор, кој е и водечки истражувач на симптомите што луѓето ги пријавуваат преку апликацијата „ZOE Covid“.
– Ако треба да кивате, задолжително направете го тоа со кивање во внатрешноста на лактот – предупредува професорот Спектор.
Тој додава дека е многу веројатно дека овој симптом е поврзан со коронавирусот, бидејќи во овој момент, барем во Велика Британија, нема многу вируси во оптек кај возрасните.
– Ако некој ви кашла во лицето и ви каже да не се грижите, бидејќи примил две дози од вакцината, кажете му да се грижи, бидејќи кивањето и симптомите слични на настинка се реални и многу луѓе ги имаат – рече истакнатиот британски епидемиолог.
Според британски „The Sun“, симптомите на ковид-19 кај луѓето кои ги примиле двете дози на вакцината изгледаат вака:
– Течење од носот – 75 проценти,
– Главоболка – 73 проценти,
– Кивање – 67 проценти,
– Болка во грлото – 53 проценти,
– Губење на чувството за мирис – 51 процент.
Да потсетиме, масовната вакцинација во Велика Британија започна на 8 декември 2020 година.
