Генералниот секретар на Беса, Аријанит Хоџа по координативниот состанок на коалиционите партнери во Владата рече дека не се согласуваат со оставката на Зоран Заев, но оти тоа е личен чин за кој премиерот сам одлучува.
– Бевме информирани дека останува на оставката, нормално наше барање е за тоа да има простор за колку време тоа би се извршило, бидејќи сме во многу деликатна ситуција политичка, каде што навистина може каков било погрешен чекор да направи тотален хаос, а тоа реално би не однело до предвремени избори за што сите се согласивме дека не е момент, ниту има простор да се организираат – заклучи Хоџа.
Тој рече дека на средбата, коалициските партнери покажале дека мнозинството е стабилно и дека владејачкото мнозинство треба да продожи.
– Сите се согласивме дека какви било процеси што би воделе кон предвремени парламентарни избори ќе бидат многу проблематични, тешки и за економската ситуација, социјалната и безбедносната во државата. Затоа сите едногласно сме против организирањето на предвремени избори. Се наоѓаме во многу деликатен процес и заради тоа треба сите заеднички да го искажаме ставот дека навистина е потребно да продолжи владејачкото мнозинство бидејќи целта и на оваа Влада кога се состави беше да се убрза процесот на евроинтеграции – рече Хоџа.
