Побелувањето на реката Брегалница со хемикалија од фабриката Техникал Текстијал во штипската ТИР зона помина со парична казна од 200.000 денари. Казна заработи и управителот на фирмата. Еколошкиот инцидент се случи пред речиси две години, кога пукна црево од цистерна при дотур на хемикалија. Граѓаните и риболовците тогаш реагираа и одводниот канал кој се влева во Брегалница тогаш ги однесе во штипската ТИР зона. Пред седум дена управителот на Техникал Текстајл ја призна вината и се извини на граѓаните на Штип, а штипскиот Основен суд денеска ја објави пресудата.
-Основниот суд во Штип претставен од судија поединец донесе Пресуда поради признание на вина, со која управителот на правното лице и правното лице се огласени за виновни и осудени на парична казна и тоа: на управителот на правното лице за сторено кривично дело од чл.218 му е изречена парична казна во износ од 2000 евра во денарска противвредност од 123.000 денари, а на правното лице за сторено кривично дело од чл.218 му е изречена парична казна во износ од 200.000 денари, се вели во соопштението од Основен суд-Штип.
Делото за кое им се судеше на управителот и компанијата предвидува максимална казна од 500.000 денари, претходно со прекршочен налог компанијата плати 2.000 евра. Хемикалијата која ја побеле реката Брегалница за среќа не беше штетна за животинскиот и растителниот свет, а не ги загади и бунарите, од кои штипјани пиееја вода.
