Полските власти планираат да урнат 60 споменици на советски војници, изјави Карол Навроцки, раководител на Институтот за национално сеќавање, пренесе Бгнес.
– Имаме список од околу 60 локации од кои тие (спомениците) мора да бидат отстранети – изјави Навротски за Радио Гдањск.
Тој рече дека многу локални претставници сега се „подготвени да го решат проблемот“.
Според Навроцки, во блиска иднина се планира уништување на споменици во Великополското и Шлезиското војводство.
Тој нагласи дека доколку локалните власти не сакаат да ги уништат спомениците „можат да ја очекуваат неговата посета“.
– Можеби имаат аргументи да ме убедат дека црвената ѕвезда, симбол на системот што уби 100 милиони луѓе, треба да биде на јавна површина – рече тој.
Во последните години во Полска се уништени стотици споменици на војниците на Црвената армија кои загинаа во ослободувањето на земјата. Во летото 2017 година, полскиот претседател Анджеј Дуда потпиша амандмани на законот со кој се забранува пропаганда на комунистички или друг тоталитарен систем во имиња на згради, објекти и простории за јавна употреба.
Законот предвидува, меѓу другото, уривање на советските споменици. Според проценките на Институтот за национално сеќавање на Полска, кој е одговорен за меморијалните активности, законот за декомунизација ќе влијае на околу 230 споменици на Црвената армија. Во исто време, според законот, декомунизацијата нема да влијае врз местата за погребување.
