Владина делегација во чиј состав беа советникот за одбрана Драган Василевски и државниот секретар во Министерството за одбрана Драган Николиќ, денеска положи цвеќе на спомен-плочата во месноста Карпалак, на автопатот Скопје – Тетово, во спомен на загинатите бранители, соопшти владината прес-служба.
Со достојни државни почести годинава се одбележуваат 21 година од загинувањето на десеттемина припадници на резервниот состав на Армијата, кој од заседа беше нападнат во оружениот конфликт во 2001 година.
Во чест и сеќавање на трагично загинатите резервисти: Нане Наумоски, Сашо Китаноски, Горан Миноски, Ердован Шабаноски, Љубе Грујоски, Бранко Секулоски, Дарко Вељаноски, Пеце Секулоски, Веби Рушитоски, Марко Деспотоски, сите од Прилеп и прилепско, денеска беше оддадена почит и на нивните вечни почивалишта, а беше одржана и панихида во црквата „Св. Петка“ во населбата Точила во Прилеп.
Одбележувањето на загинувањето на армиските припадници продолжи со оддавање почит и положување цвеќе на комплексот „Карпалак“ во центарот на Прилеп, каде се одржа централното одбележување на 21 година од нивната смрт, каде положија цвеќе и бројни делегации и бранители.
Чествувањето на годишнината од загинувањето на десеттемина армиски резервисти започна синоќа во Прилеп, каде во име на Владата на Република Северна Македонија, беше положенo цвеќе пред спомен-обележјето во касарната „Мирче Ацев”, како и пред споменикот на бранителите во прилепското село Лениште, а беше одржана и вечерна богослужба во манастирот „Св. Петка“, информираат од владината прес-служба.
Делегацијата на ВМРО-ДПМНЕ денеска положи цвеќе кај Карпалак, по повод одбележувањето на 21-годишнината од погибието на десетте армиски припадници.
Инаку, на Карпалак цвеќе положи и делегацијата на ВМРО-ДПМНЕ, која беше предводена од пратеникот Александар Велјановски, пратеничката Жаклина Пешевска, пратеникот и претседателот на Унијата на жени на ВМРО-ДПМНЕ, Дафина Стојаноска, пратеникот Сергеј Попов и претседателот на Унијата на млади сили на ВМРО-ДПМНЕ, Ангел Карапетров.