Шефот на украинскиот енергетски оператор Енергоатом, Петро Котин денеска изјави дека мировните сили на Обединетите нации би можеле да ја обезбедат електраната во Запорожје, која е окупирана од Русија и постојаните напади во таа област се закануваат да предизвикаат нуклеарна катастрофа.
Тој посочи дека мировниот контингент на ОН би можел да воспостави безбедносна зона во Запорожје и руските војници да се повлечат, јавува Би-Би-Си.
Неговата изјава доаѓа еден ден откако Меѓународната агенција за атомска енергија (МААЕ) побара од завојуваните страни да воспостават безбедна зона таму.
Владимир Путин рече дека верува во извештајот на МААЕ, но ја критикуваше агенцијата што не кажа дека Украина е виновна за гранатирањето на областа.
Украинскиот претседател Володимир Зеленски ги поздрави повиците на МААЕ за воспоставување безбедносна зона во Запорожје.