Американската национална агенција за всленски истражувања NASA објави исклучителна фотографија од Охридското и Преспанското Езеро во нивната природна боја.
Во прилогот се наведува дека најголем дел од водата во Охридското Езеро доаѓа од подводни извори, но околу 20 отсто од неа се спушта од повисоката надморска височина во соседното Преспанско Езеро преку подземните карстни канали.
Во текстот објавен на сајтот на Земјината опсерваторија насловен како „Двојка древни езера“ се вели дека снимката е направена на 19-ти август 2022 година.
„Охридското и Преспанското Езеро, две од најстарите езера во Европа, се наоѓаат во планинска област долж границите на Северна Македонија, Албанија и Грција. Езерата опстојуваат најмалку еден милион години, а можеби и подолго. Охридското е поголемото и подлабоко од двете, со средна длабочина од 155 метри (509 стапки), додека Преспанското има средна длабочина од 14 метри (45 стапки). Својата долговечност езерата ја должат на одржливата тектонска активност што предизвикува земјиштето под нив да потоне, создавајќи грабени или ниски долини опкружени со раседи. Ова тековно тонење на долините го спречува создавањето на седименти и растителниот свет и претворање на езерата во мочуришта со текот на времето, како што се случува со повеќето езера по неколку илјади години“, се вели во прилогот.
NASA потсетува дека повеќето од милионите езера во светот се стари помалку од 18 000 години и настанале кога глечерите се стопиле на крајот од последното ледено доба. Геолозите класифицираат само 30 езера, вклучувајќи ги Охридското и Преспанското, како „антички“ – дефинирани од некои истражувачи како опстојување на повеќе од еден циклус на ледено доба (најмалку 130 000 години). Геолозите мислат дека околу 20 езера на Земјата, главно пронајдени во грабени, опстојуваат повеќе од еден милион години.
