И покрај мрачните предупредувања на првиот човек на „Гаспром“ за замрзнување на градовите, цената на гасот во Европа продолжува да паѓа и на аукциите во петокот веќе е под 150 евра/MWh. Германија го наполни складиштето за гас до 95%, а метеоролозите предвидуваат потопла зима од вообичаеното.
Фјучерс цената на холандската берза за гас ТТФ сега е на најниско ниво од крајот на јуни, откако во август се искачи на 340 евра.
Германија си постави цел да наполни 95 отсто од складиштето на гас до 1 ноември, но тоа го направи пред предвиденото.
Ако зимата навистина испадне блага, тоа ќе ѝ помогне на Европа да ја намали потрошувачката за 15% во текот на грејната сезона. Како што е соопштено од службата за климатски промени Коперник, нејзиниот климатски модел покажува 50-50 шанси за наднормални температури во наредните месеци во Британија, многу области на централна Европа и поголемиот дел од Медитеранот. Во останатиот дел од Европа, веројатноста за значително надминување на просечните историски температури е 40-50%, пишува „Москва тајмс“.
Шефот на „Гаспром“, Алексеј Милер, во средата рече дека за време на највисокиот студ следната зима, цели градови во Европа може да замрзнат.
„Зимата може да биде релативно топла, но една недела или пет дена ќе бидат ненормално студени. Во тој краток временски период, не дај боже, цели градови може да замрзнат“.
Според „многу песимистички“ прогнози, до март 2023 година околу 5% од гасот ќе остане во европските складишта, рече Милер во својот говор на форумот „Руската недела на енергија“.
Меѓународната агенција за енергетика неодамна предвиде дека 5% од гасот може да остане во складиште во случај на целосен прекин на руските испораки од 1 ноември и со незначителен увоз на течен природен гас (ЛНГ) во својот преглед на светскиот пазар на гас.
Според нејзините пресметки, пак, со значителни залихи на течен гас, складиштата до крајот на зимата ќе бидат полни 20 отсто. Ако Европа може да ја намали потрошувачката на гас за 13% (во споредба со нивоата на потрошувачка од пет години), тогаш дури и со незначително снабдување со ЛНГ, ќе остане повеќе од 33% гас во складиштето, тврди агенцијата.
Енергетската криза не дојде за краток временски период, изјави Алексеј Милер. Тој додаде дека причините за тоа се системски, но не спомна дека оваа криза е поврзана со прекинатите испораки на „Гаспром“ во европските земји.
На крајот на годината падот на извозот на „Гаспром“ во Европа ќе биде 50%, очекува Меѓународната агенција за енергија; во третиот квартал падна за 70%, како резултат на што увозот на течен природен гас од САД го надмина снабдувањето со гасоводен гас од Русија за прв пат во историјата.
Во ноември се зголемува можноста за зголемување на испораките од САД, бидејќи тогаш треба повторно да профункционира најголемиот терминал за течен гас – Freeport LNG, кој престана да работи поради пожар во јуни.
Според анализите на Морган Стенли, доколку дојде до закрепнување на кинеската економија, може да се очекува зголемување на конкуренцијата меѓу корисниците на течен гас. Поради побавните стапки на раст оваа година, побарувачката на течен природен гас во Кина не беше особено силна, а кинеските компании кои го купија дури и ги пренасочија танкерите кон Европа.
„Големиот обем на увоз на ЛНГ во Европа во последните месеци делумно се должи на нискиот кинески увоз“, рече Морган Стенли.
Увозот на течен природен гас неутрализира две третини од падот на испораките од Русија, а преостанатата една третина може речиси целосно да се компензира со пад на температурите на зградите за 3%. Ова е мислењето на Пјер Андуранд, основач и главен инвестициски директор на Andurand Capital Management, еден од најуспешните хеџ фондови кои работат на пазарот на стоки, во својата статија објавена во „Фајненшл тајмс“ „Како Европа може да се прилагоди на животот без руски гас“.
Парискиот универзитет Sciences Po веќе донесе одлука за намалување на температурите во текот на зимската сезона на 19 степени, изјави заменик-ректорот Сергеј Гуриев. „Мислам дека ќе преживееме. Многу руски граѓани, поради некоја причина, мислат дека со запирање на снабдувањето со гас, Путин ја уништува европската економија. Но, тоа не е така“, коментира тој.
