Портпаролот на Пентагон, Џон Кирби, изјави дека американскиот министер за одбрана „ја анализира“ информацијата дека две руски ракети погодиле локација во Полска на границата со Украина. „Во моментов немаме елементи за да ја потврдиме таа информација“, изјави портпаролот, додавајќи дека информациите се уште се проучуваат, пренесе АП.
НАТО соопшти дека ги разгледува извештаите дека ракети или проектили паднале во земјата-членка Полска и дека тесно соработува со полските власти.
„Ги проучуваме овие извештаи и тесно се координираме со нашиот сојузник Полска“, изјавил претставник на НАТО за Си-Ен-Ен.
Ако навистина се утврди дека се работи за руски ракети, што Русија го демантира, прашање е како ќе се позиционира НАТО.
Повеќето аналитичари кои досега го коментираа овој настан се согласуваат дека одлуката ќе зависи од тоа која од двете политики ќе се применува – член 4 или член 5.
Членот 5 вели дека „доколку некој сојузник на НАТО биде жртва на вооружен напад, секоја друга членка на Алијансата ќе го смета овој чин на насилство како вооружен напад врз сите членки и ќе преземе такви дејствија што ќе смета дека се неопходни за да му помогне на сојузникот што бил нападнат“.
Ако се користи, тоа речиси неизбежно би значело некаква форма на воен напад против Русија. Сепак, и покрај спомнувањето на член 5, се чини дека има груб консензус меѓу аналитичарите дека е многу поверојатно да се повика членот 4.
Според официјалните документи на НАТО, член 4 значи дека „страните ќе се консултираат меѓу себе“ доколку се одлучи дека е загрозен нивниот „територијален интегритет, политичка независност или безбедност“. Очигледно, се чини дека тоа вклучува многу помал ризик од значителна ескалација и ширење на конфликтот, што е нешто од што сите се плашат по таков настан.
