
Укинување на задолжителната маска во јавниот превоз, намалување на плафонот на цените на тестовите, укинување на задолжителниот сертификат за вработените во болниците и центрите за стари лица, укинување на задолжителната изолација од 14 дена за нелегалните мигранти кои пристигнуваат во земјата, се дел од промените што ги воведува Кипар во однос на Covid-19.
Како што пренесуваат кипарските медиуми, со веќе објавениот претседателски декрет, дополнително се олабавуваат или целосно се укинуваат дел од постоечките мерки за заштита од коронавирусот.
Поконкретно, за посета на болниците, старечките домови и други затворени структури за грижа и сместување на стари лица и ранливи групи, остануваат задолжителни и негативниот тест за лица над 12-годишна возраст и употребата на заштитна маска.
Непроменети остануваат и упатствата за задолжителна изолација од пет до седум дена за позитивните случаи, додека пак се укинува префрлањето на заразените од хотели во специјални простори за изолација.
Промени има и во цените на тестовите, односно плафонот за PCR од 30 се намалува на 25 евра, а на брзиот тест од десет на пет евра.
Во изминатата седмица на Кипар биле регистрирани 950 случаи на Covid-19 и починале четири лица.