Компанијата за импланти на мозок на Илон Маск, Neuralink соопшти дека добила зелено светло од американската Администрација за храна и лекови (ФДА) да го започне своето прво клиничко испитување на луѓе.
Маск постојано изјавуваше дека неговата компанија за медицински помагала Neuralink ќе започне со човечки испитувања на мозочни импланти за лекување на тешки состојби како парализа и слепило, а се најде на насловните страници кон крајот на минатата година кога рече дека е веќе толку уверен во безбедноста на уредот, што е подготвен да ги вгради и во своите деца.
Сепак, компанијата основана во 2016 година, не побара одобрение од ФДА до почетокот на 2022 година, кога агенцијата го одби барањето, изјавија за Ројтерс седум сегашни и поранешни вработени, додавајќи дека ФДА покренала неколку прашања со Neuralink кои треба да се решат пред да се започне со човечки испитувања.
Главните проблеми ги вклучуваа литиумската батерија на уредот, можноста за мигрирање на жиците на имплантот во мозокот и предизвикот за безбедно извлекување на уредот без оштетување на мозочното ткиво.
Одобрувањето од ФДА доаѓа кога американските законодавци ги повикуваат регулаторите да истражат дали составот на панелот што го надгледува тестирањето на животни во Neuralink придонел за неисправни и избрзани експерименти, а компанијата претходно беше предмет на федерални истраги.
