Шпанските фудбалери до 21 година ќе играат во полуфиналето на Европското првенство за нивната возрасна група, откако во саботниот четвртфинален натпревар одигран во Букурешт ги совладаа врсниците од Швајцарија со 2:1 по продолженијата.
Стрелец на водечкиот гол за надмоќните Шпанци беше Серхио Гомез во 68. минута. Сепак, неубедливите Швајцареци не се предадоа и а сосема неочекувано израмнија во првата минута од судиското надополнување на регуларниот дел од натпреварот, а стрелец беше Зеки Амдуни. Победникот беше решен во дополнителни 30 минути, а Хуан Миранда со гол во 103. минута ги постави конечните 2:1 за Шпанија.
Шпанија во полуфиналето ќе игра против подобриот од дуелот меѓу Франција и Украина, кој е закажан за в недела во 21 частот во Клуж-Напока.
Во првото четвртфинале в саботата вечерта одиграно во Тбилиси, репрезентацијата на Израел со подобро изведување на пеналите (4:3) ја совлада селекцијата на домашната Грузија. Немаше голови во основните 90 минути кои донесоа интензивен исцрпувачки фудбал со бројни шанси пред двата гола, како и во 30-те минути продолжение кога темпото очекувано опадна.
Израелците во мечот за финалето ќе се соочат со подобриот тим од мечот меѓу Англија и Португалија, кој е закажан за в недела во 18 часот во Кутаиси.
