Човек за кој британската полиција верува дека ја предводел операцијата за шверц на 10.000 луѓе во Обединетото Кралство како дел од паневропска мрежа, е осуден на 11 години затвор во Белгија, соопшти британската Национална агенција за криминал (NCА).
Триесетгодишниот Хева Рахимпур, со иранско потекло, ја водел мрежата од неговиот дом во Илфорд, во источен Лондон, каде што набавувал чамци од Турција и ги доставувал до Германија, Белгија и Холандија, соопшти NCA. Неговата мрежа потоа ќе ги испратела на северниот француски брег за да шверцуваат мигранти преку Каналот (Ла Манш, како што го нарекуваат Французите) во Англија.
Прашањето за барателите на азил кои пристигнуваат во Британија без дозвола е големо политичко прашање, премиерот Риши Сунак вети дека еден од неговите приоритети ќе биде „да ги запре чамците“, а владата е вмешана во правен спор околу тоа дали може да ги пресели мигрантите во Руанда, додека бидат разгледувани нивните барања за азил.
Минатата 2022 година преку Каналот пристигнале рекордни 45.755 луѓе, а годинава досега биле откриени повеќе од 25.000.
Од NCA соопшти дека апсењето на Рахимпур предизвика репресии и апсења низ Европа, при што во Германија беа запленети 60 чамци на надувување и стотици елеци за спасување. Судот во Обединетото Кралство нареди негова екстрадиција во Белгија, каде што обвинителите соопштија дека неговата мрежа им наплаќала на мигрантите меѓу 3.660 и 7.320 долари за преминување.
Други 19 лица, исто така, беа осудени на затворски казни од 30 месеци до осум години.
„Мрежата на Хева Рахимпур беше, во моментот на неговото апсење, една од најплодните криминални групи вклучени во премини со мали бродови, играјќи улога во транспортирањето на илјадници мигранти во Обединетото Кралство“, изјави заменик-директорот за истраги на NCA, Крег Тарнер.
