Хамас може да ослободи околу 50 лица со двојно државјанство, кои се држат во Појасот Газа, објави Њујорк Тајмс, цитирајќи висок израелски воен претставник.
Според весникот, функционерот рекол дека „врз основа на разговорите што САД ги имале со Катар, постои можност Хамас да ги ослободи околу 50 лица со двојно државјанство, одделени од кој било поширок договор“.
Си-Ен-Ен претходно објави дека САД извршиле притисок врз Израел да ја одложи копнената операција во Газа и да обезбеди ослободување на заложниците.
Израелската армија соопшти дека има информации за 222 лица кои се држени како заложници од Хамас.
Катарското Министерство за надворешни работи на 21 октомври соопшти дека шеикот Мохамед бин Абдулрахман бин Џасим Ал-Тани, премиер и врвен дипломат на земјата, остварил телефонски разговор со американскиот државен секретар Антони Блинкен за да разговараат за начините за ослободување на заложниците во Газа. Министерството соопшти дека шеикот Мохамед „ја потврдил континуираната координација на државата Катар со Соединетите Американски Држави и меѓународните партнери за ослободување на затворениците и намалување на ескалацијата во Појасот Газа“.
Тензиите на Блискиот Исток повторно се разгореа на 7 октомври кога милитантите од радикалната палестинска група Хамас извршија ненадеен упад на израелска територија од Појасот Газа. Палестинското движење го опиша својот напад како одговор на агресивните дејствија на израелските власти против џамијата Ал Акса во Стариот град во Ерусалим. Израел најави целосна блокада на Газа и почна да изведува напади врз палестинската енклава, како и врз одредени области во Либан и Сирија. Судири има и на Западниот Брег.
