Фудбалерите на Реал Мадрид во третиот настап ја постигнаа третата победа во Лигата на шампионите, совладувајќи ја португалска Брага со 2:1 на гостински терен во групата Ц.
По бразилската комбинација, Реал поведе во 16. минута. Винисиус Жуниор асистираше, а Родриго постигна гол. Домашниот тим не беше особено импресиониран од респектабилниот противник и одигра храбро и агресивно. Имаше шанси и на двете страни, но во таков ритам повторно се затресе домашната мрежа. Во 61. минута повторно асистент беше Винисиус, а стрелец за 2:0 беше одличниот Џуд Белингем. Упорноста и разиграноста на Брага даде резултат 63. минута кога Алваро Џало намали на 1:2. Потоа Реал се повлече и домаќинот со сите сили се обидуваше да израмни, но не успеа.
Во оваа група Ц нова победа забележа и Наполи победувајќи го со минимални 1:0 Унион Берлин. Решавачкиот гол го постигна Распадори по асистенција на Кваракелија во 65. минута.
Водечкиот Реал има девет бода, Наполи има шест, Брага три, додека последниот Берлин сѐ уште е без бодови.
Во групата Б, Арсенал на гостински терен ја победи Севиља со 2:1 и ја оствари втората победа. Одличен беше Бразилецот Габриел Жесус, кој најпрво блескаво го започна контранападот во судиското надополнување на првото полувреме, кое го заклучи неговиот сонародник Мартинели со гол за 1:0. Потоа во 53. Габриел Жесус изведе краток дриблинг и потоа мајсторски погоди во спротивниот агол од многу тешка ситуација за 2:0. Севиља намали во 58. минута кога Иван Ракитиќ асистираше од корнер, а Немања Гудељ со глава погоди за 1:2. Тоа беше сѐ што успеаја да направат Андалузијците.
Во вториот меч од оваа група Ленс и ПСВ ремизираа 1:1. Многу убав гол постигна Бакајоко во 54. минута за водство на гостите од Ајндховен, но десет минути подоцна Ваха израмни.
На чело на табелата во групата Б е Арсенал со шест бодови, Ленс има пет, а Севиља и ПСВ по два.
Во групата А, Манчестер Јунајтед со многу мака го победи ФК Копенхаген со 1:0 на својот „Олд Трафорд“. Манчестер Јунајтед можеше да биде во негатива од петтата минута, но го спаси рамката на голот по ударот на Диого Гонкалвес. Во речиси изедначена игра, бидејќи Данците беа многу опасни во напаѓачките излети, домашните некако ја турнаа топката во противничката мрежа во 72. минута, а Хари Мегваер од непосредна близина постигна гол со глава. Сѐ беше подготвено за нов шок во 96. минута, бидејќи беше досуден пенал за гостите, но тоа го спречи голманот на Јунајтед, Онана, кој одлично го одбрани од ударот на Ларсон од белата точка. Вака Манчестер Јунајтед ја забележа првата победа сезонава во Лигата на шампионите.
Претходно во вторникот во оваа група А, Баерн оствари нова, трета победа, го победи Галатасарај со 3:1 во Истанбул, иако турскиот првак беше подобриот тим повеќе од еден час игра. Домашниот тим падна во финишот на мечот, па Хари Кејн во 73. минута погоди за 2:1 за Баерн, а само шест минути подоцна сѐ беше решено. Тогаш асистираше Кејн, а стрелец за 3:1 беше Мусиала. Пред тоа Баерн водеше со раниот гол на Коман, додека Аргентинецот Мауро Икарди израмни по половина час игра со удар од белата точка.
Првиот Баерн има девет бода, Галатасарај има четири, Манчестер Јунајтед три, а дански ФК Копенхаген еден бод.
Бенфика веќе дојде на работ на испаѓање, откако го загуби третиот натпревар во групата Д, и не само тоа, туку португалскиот шампион не постигна гол цели 270 минути. Овојпат Реал Сосиедад славеше како гостин на стадионот „Луж„ со 1:0. Бенфика постигна гол во раната фаза од натпреварот, хрватскиот репрезентативец Петар Муса беше стрелец, но славјето на домаќините го спречија ВАР и офсајд позицијата. Натпреварот беше решен во 63. минута кога единствен стрелец беше Браис Мендез, што веќе е негов трет гол сезонава во Лигата на шампионите.
Претходно во оваа група Интер во Милано го совлада австрискиот шампион Ред Бул Салцбург со 2:1. Интер поведе во 19. минута со голот на Алексис Санчез, додека гостите израмнија во 57. минута. Во таа акција асистенцијата на Кјаергард, Израелецот Глух беше стрелец за 1:1. Интер брзо го врати водството, а стрелец за три бода во 64. минута беше турскиот играч за врска Хакан Чалханоглу, кој погоди од белата точка.
На табелата Интер и Реал Сосиедад ги делат седум бодови. РБ Салцбург има три, а Бенфика нула.
