Судот на Босна и Херцеговина го закажа почетокот на судењето на лидерот на босанските Срби Милорад Додик за 22-ри ноември, а во пресрет на тоа судење тој повторно тврдеше дека судот не е легален и најави посилно потпирање на Русија.
Преде десет дена лидерот на босанските Срби, Милорад Додик пред Судот на Босна и Херцеговина не се изјасни за обвинението поднесено против него поради неспроведување на одлуките на високиот претставник на меѓународната заедница, Кристијан Шмит, наведувајќи дека не разбира што пишувало во него и додавајќи дека верува дека пресудата е веќе донесена.
Обвинението следеше откако Народното собрание на Република Српска на 27-ми јуни усвои два закони – за необјавување на одлуките на Канцеларијата на високиот претставник во БиХ (OHR) во Службен весник на Република Српска и за неприменување на одлуките на уставниот Судот на БиХ. Високиот меѓународен претставник Кристијан Шмит ги поништи двата закони на 1-ви јули. Властите во српскиот ентитет не ја признаваат легитимноста на Шмит, бидејќи Високиот претставник првпат е поставен без дискусија во Советот за безбедност при ОН.
На својата веб-страница, судот го објави почетокот на главната расправа за споменатиот датум пред судијата Мирсад Штрика, кому предметот му беше доделен преку системот за автоматска распределба. Долгогодишниот судија Штрика веднаш по објавувањето на информациите за случајот се најде на удар на медиумите од Република Српска, кои и претходно упорно го обвинуваа за пристрасност. Во оваа кампања се приклучија и најблиските колеги на Додик на владини позиции, како премиерот на ентитетот Радован Вишковиќ.
„И судијата и обвинителот се Бошњаци, немам ништо против бошњачкиот народ, но искуствата што ги имавме во Судот на Босна и Херцеговина ни даваат право да немаме доверба во таков процес“, рече Вишковиќ во четвртокот вечерта на митингот во поддршка на Додик во Добој. Вишковиќ рече и дека целта на ваквите средби е на Додик да му се испрати порака да не „учествува“ на претстојното судење.
На сличен став е и претседателот на Народното собрание на Република Српска, Ненад Стевандиќ, кој во четвртокот изјави дека постои можност парламентот да донесе одлука со која ќе го обврзе Додик да не оди на судење во Сараево. Тој смета дека на овој начин е неопходно да се заштити институцијата претседател на Република Српска.
Доколку Додик одбие да одговори на поканата за судење, тоа би значело дека полицијата ќе мора да го приведе, а таквото сценарио ги подгрева шпекулациите за тоа која агенција ќе го стори тоа и каква ќе биде евентуалната реакција во Република Српска. Министерот за внатрешни работи на Федерацијата Босна и Херцеговина, Рамо Исак, на почетокот од седмицава изјави дека неговите полицајци без двоумење ќе ја извршат оваа задача доколку добијат судски налог.
Додик и директорот на Службен весник на Република Српска, Милош Лукиќ, беа обвинети врз основа на одредбите од Кривичниот законик на Босна и Херцеговина, според кои неспроведувањето на одлуките на високиот претставник на меѓународната заедница е кривично дело за кое е предвидена казна затвор од шест месеци до пет години. Осудата значи и автоматска забрана за вршење на избрана функција, што во случајот на Додик е смена од функцијата претседател на Република Српска
Во изјава за локалната телевизија во Прњавор, Додик во четвртокот рече дека Судот на Босна и Херцеговина сè уште го смета за незаконски и дека знае дека целта на процесот е соборување на актуелната влада во РС предводена од неговата Алијанса на Независни социјалдемократи (СНСД), и дека зад се стои заговор што го водат СЕГА.
„Одлучија прво да го ‘легнат’ Милорад Додик, да го затворат за, според нив, СНСД да почне да се распаѓа“, рече водачот на босанските Срби употребувајќи народски жаргон.
Додека го чека почетокот на судењето, Додик реши да отпатува за Русија во ноември и се надева дека таму повторно ќе се сретне со претседателот Владимир Путин. Пред тоа патување, во интервју за руската мрежа Sputnik, се пожали на санкциите што САД ги воведоа на неговата ќерка и син оваа недела и рече дека сака повеќе да се потпира на руската поддршка. Покрај тоа, тој отворено ја поддржа руската агресија врз Украина.
„Верувам дека Русија мора да ја заврши својата работа во Украина, таа не може да има доверба во Западот. Верувам дека Русија верува, и ќе го прашам самиот претседател, колку што може да каже, дека крајната цел мора да биде совршена контрола на цела област која може да биде опасна за самата Русија“, заклучи Додик.
