Отворено писмо до јавноста, УЈП, министерството за образование и инспекторатите, од вработените на АУЕ-ФОН Универзитето:
Ние, професорите и вработените на Универзитетот АУЕ-ФОН, се чувствуваме обврзани да ви ја предочиме страшната ситуација во која моментално се наоѓа нашата почитувана институција. Сметаме дека наша должност е да ја информираме пошироката јавност, медиумите и владините институции за критичните прашања кои опстојуваат премногу долго, и поради кои е загрозено функционирањето на еден од нареспектибилните универзитети во Македонија.
Универзитетот АУЕ-ФОН е во состојба на целосен хаос, пред се поради континуираното неисплаќање на платите на нашите посветени вработени. Но и постојано заминување на вработени (заради причините објаснети во ова отворено писмо) без кои дневната работа на АУЕ-ФОН е невозможна.
За да ја илустрираме сериозноста на проблемот, ве известуваме дека последната исплатена плата на универзитетот е за месец јули 2023 година. Кое уследи по речиси 5 неисплатени плати за претходниот период од оваа година.
Ова продолжено неисплатување на платите (кое трае во континуитет неколку години) предизвикува огромни финансиски тешкотии и психички нарушувања помеѓу нашите вработени. Платите на сите беа сведени на апсолутен минималец за време на пандемијата, а профитот кој го оствари универзитетот беше пренасочен кон странски инвеститори, кои како што магично се појавија, така уште помагично ги снема.
Уште поалармантен е нехуманиот третман на кој беа изложени дел од вработените во овој период. Универзитетскиот менаџмент во континуитет применува тактики на внесување раздор, притисоци за откажување од работна позиција и префрлање во договор на дело, кои ги оставија нашите колеги во состојба на постојана вознемиреност. Заканите за раскинување на договорот се посебно насочени кон оние кои се осмелуваат да зборуваат за внатрешните проблеми на универзитетот, поттикнувајќи клима на страв и тишина.
Покрај тоа, менаџментот на Универзитетот АУЕ-ФОН постојано не успева да обезбеди соодветно медицинско осигурување на своите вработени. Овој пропуст во обезбедувањето соодветна здравствена покриеност резултираше со одложени дијагнози и хронични здравствени проблеми за многу од нашите колеги. Ова е тешко кршење на нашите основни права на здравје и благосостојба.
Она што дополнително ја влошува оваа вознемирувачка ситуација е нашето цврсто верување дека универзитетот поседува ресурси кои не се распределуваат за заслужените плати. Наместо тоа, се чини дека овие ресурси се пренасочени за да се финансираат екстравагантните животни стилови на раководството и неколку избрани поединци во рамките на универзитетот, но и чудни бизнис договори од кои наставнонаучниот процес нема никаква придобивка, а најмала придобивка имаат нашите ценети студенти.
Сакаме да истакнеме дека повеќе од 20 години ја градиме оваа институција и сме ги поминале најтешките премрежја во времето на рушењето на Космос, давајќи несебична поддршка на семејството Цаноски. Но оваа ситуација е невозможна.
Ги повикуваме медиумите и владините институции да ги истражат овие наводи и да ги преземат неопходните активности за да се исправи оваа тешка неправда. Иднината на нашиот ценет универзитет неговите студенти и благосостојбата на неговите вработени висат на конец, а брзата интервенција е од суштинско значење за враќање на неговиот интегритет и финансиска стабилност.
Бараме транспарентност, одговорност и правда. Ништо помалку не заслужуваат професорите на Универзитетот АУЕ-ФОН, како и посветените вработени кои неуморно придонесуваат во неговата мисија. Ние постоиме и работиме за нашите студенти но не и за бизнис интересите на малкумина кои го имаат окупирано универзитетот со години.