Министрите за надворешни работи на земјите од блокот Г7 во средата изразија поддршка за „хуманитарните паузи и коридори“ во Појасот Газа, но се воздржаа од повикување на прекин на огнот.
По разговорите во Јапонија, групата соопшти дека нивната поддршка за Украина во војната против Русија „никогаш нема да се поколеба“ и ја повика Кина да не ја поддржува Москва во тој конфликт.
„Ја нагласуваме потребата од итна акција против влошената хуманитарна криза во Газа. Ние поддржуваме хуманитарни паузи и коридори за да се овозможи итно потребната помош, движење на населението и ослободување на заложниците“, се вели во заедничката изјава на форматот што ги обединува Канада, Франција, Германија, Италија, Јапонија, Обединетото Кралство и САД и Европската Унија како придружна членка.
Министрите го истакнаа и „правото на Израел да се брани себеси и својот народ во согласност со меѓународното право, во обид да спречи повторување“ на нападот на Хамас врз Израел од 7. октомври.
Во соопштението се повикува Иран „да се воздржи од поддршка на Хамас и други акции кои можат да го дестабилизираат Блискиот исток, вклучително и поддршка за либанскиот Хезболах и другите недржавни актери“.
Од Техеран, исто така, се бара да го искористи своето влијание врз овие групи за да ги деескалира регионалните тензии.
Целокупната безбедност
Израелската армија континуирано ја бомбардира Газа од 7. октомври, кога Хамас уби најмалку 1.400 луѓе во своите напади врз пограничните области. Министерството за здравство во енклавата управувана од Хамас објави дека повеќе од 10.300 луѓе загинале во Газа.
Израелскиот премиер Бенјамин Нетанјаху во понеделникот изјави дека Газа нема да добие гориво и дека нема да има прекин на огнот додека не бидат ослободени повеќе од 240 заложници. Најави и дека Израел ќе воспостави „тотална безбедност“ во Газа по завршувањето на војната. Тој навести можност за „тактички прекини“ со цел да се ослободат заложниците и да се достави помош на опколената територија.
Во вторникот Вашингтон се спротивстави на новата долгорочна израелска окупација на Појасот Газа, од која се повлече во 2005 година.
