Фудбалерите на Тотенхем и Фулам со минимални победи против Барнли односно Ротерам Јунајтед изборија пласман во шеснаесетфиналето на англискиот ФА Куп.
Тотенхем со 1:0 го победи Барнли, а решавачкиот гол го постигна Педро Поро во 78. минута.
Со идентичен резултат Фулам славеше против последниот тим на Чемпионшип, Ротерам Јунајтед. Јамајканецот Боби Де Кордова-Рид го реши натпреварот на „Крејвен Котиџ“ во 24. минута.
Брентфорд и Вулверхемптон ремизираа 1:1, па сега им претстои реванш во Вулверхемптон. Гостите имаа играч помалку од деветтата минута откако Жоао Гомеш беше исклучен. Брентфорд поведе во 41. минута преку Нил Маупеј, а израмни Томас Дојл во 64. минута.
Во четвртокот Кристал Палас и Евертон одиграа 0:0, па исто така повторно ќе играат, овојпат на „Гудисон Парк“ во Ливерпул.
Во сабота, недела и понеделник се закажани уште 28 натпревари од 3. коло на ФА Купот. Челзи во сабота го пречекува Престон, додека Њукасл гостува кај Сандерленд во големото локално дерби. Манчестер Сити во недела игра на домашен терен против Хадерсфилд Таун, а на стадионот „Емирати“ ќе се игра големото дерби меѓу Арсенал и Ливерпул.
