Пет натпревари се одиграа синоќа во НБА лигата, а највозбудлив беше оној во Милвоки, каде домашните Бакс со „тројката“ на Демијан Лилард на 1,6 секунди до крајот на продолжението ги совладаа Сакраменто Кингс со 143:142.
Лилард го заврши натпреварот со 29 поени и осум асистенции, а Јанис Адетокумбо додаде 27 поени, десет скока и десет асистенции за нов „трипл-дабл“ учинок.
Де’Арон Фокс ги предводеше сите стрелци на овој меч со 32 поени и го испрати натпреварот во продолженија со „леј-ап“ со сирената на крајот од регуларниот тек, а потоа впиша „тројка“ за да ја поттикне серијата на Сакраменто од 13:9, што им донесе водство на гостите од 141:137 на само 33,9 секунди до крајот. Домантас Сабонис го забележа 10-от „трипл-дабл“ сезонава за Кингс со 21 поен, 13 скока и 15 асистенции. Малик Монк постигна 28 поени, Кевин Хуертер имаше дабл-дабл за Сакраменто со 26 поени и 10 скока.
Феникс Санс ги победија Портланд Трејл Блејзерс на гости со 127:116. Најдобар поединец кај Феникс беше Девин Букер со 34 поени и седум асистенции, а го следеа Бредли Бил со 23 поени и Кевин Дурент со 21 поен. Скут Хендерсон беше најдобар во редовите на Портланд со 33 поени и девет асистенции, седум скока и три украдени топки, а Анферни Симонс додаде 28 поени.
Минесота Тимбервулфс на домашен терен ги победија Лос Анџелес Клиперс со 109:105, а до славјето ги предводеше Ентони Едвардс со 33 поени. Карл-Ентони Таунс постигна 17 поени за Минесота, а Руди Гобер имаше 15 поени и 18 скока за својот трет последователен „дабл-дабл“ учинок. Најдобар стрелец кај Клиперс беше Каваи Ленард со 26 поени и девет скока.
Денвер Нагетс победија на гостувањето кај Индијана Пејсерс со 117:109, а победничкиот тим го предводеа Мајкл Портер Јуниор, Никола Јокиќ и Џамал Мареј со по 25 поени. Портер Џуниор постигна седум „тројки“, а Јокиќ на својот учинок од 25 поени додаде 12 скока и девет асистенции. Брус Браун ја предводеше Индијана со 18 поени и 10 скока во неговиот прв натпревар против Денвер откако ја освои титулата во НБА со Нагетс во јуни годинава.
Мајами Хитс на домашен терен го победија Шарлот Хорнетс со 104:87. Бам Адебајо беше најдобар во победничкиот тим со 24 поени, 10 скока и седум асистенции
