Нема начин да се решат долгорочните безбедносни предизвици за Израел и краткорочните предизвици за обнова на Газа без формирање палестинска држава, изјави во четвртокот портпаролот на американскиот Стејт департмент, Метју Милер.
Говорејќи на брифинг со новинарите, Милер рече дека Израел има можност токму сега бидејќи земјите во регионот се подготвени да му дадат на Израел безбедносни гаранции.
„Нема начин да се реши нивниот долгорочен предизвик за постојана безбедност и краткорочниот предизвик за обнова и нова влада во Газа без формирање палестинска држава“, рече дипломатот.
САД го дадоа својот коментар откако израелскиот премиер Бенјамин Нетанјаху на прес-конференција претходно во четвртокот рече дека му кажал на Вашингтон дека се противи на каква и да е палестинска државност која нема да дозволи Израел да има безбедносна контрола врз целата територија на Појасот Газа.
„Јасно ставам до знаење дека во секој договор во догледна иднина, со или без договор, Израел мора да има безбедносна контрола врз целата територија западно од реката Јордан. Ова е неопходен услов“, рече Нетанјаху во Тел Авив.
Израелскиот премиер додаде дека непостоењето на палестинска државност не и стоело на патот на договорите за нормализација на односите со арапските држави пред неколку години и дека сè уште има намера да вклучи повеќе земји во тие договори.
Се чини дека по ова прашање се појавија првите поголеми несогласувања меѓу Израел и неговиот најголем поддржувач, Соединетите држави, од почетокот на израелската војна, како што се тврди против радикалното палестинско движење Хамас на 7-ми октомври минатата година..
Нетанјаху и неговата десничарска коалициска влада во голема мера го отфрлаат формирањето на палестинска држава, иако Вашингтон тврди дека решението со две држави е единствениот остварлив начин за постигнување траен мир во регионот, објаснува Reuters.
Решението за две држави – палестинска и еврејска, како што предвидува резолуцијата на Обединетите нации од времето на создавањето на Државата Израел, како главен предуслов за прекин на деценискиот израелско-палестински конфликт, го истакнаа уште на почетокот на последната војна и Кина и Русија.
