Лидерот на босанските Срби, Милорад Додик, во средата во рускиот град Казан, во Татарстан, се сретна со рускиот претседател Владимир Путин, при што размениле комплименти и најавиле зајакнување на соработката и пријателските односи што ги имаат.
Додик пристигна во Русија по посетата на Минск, каде разговараше со белорускиот претседател Александр Лукашенко, а со Путин се сретна и откако рускиот лидер пристигна во Казан за да го отвори спортскиот натпревар „Игри на иднината“ на кој учествуваат ентитетите во Руската Федерација.
„Република Српска е наш пријател, ви благодариме што ја поддржувавте Русија“, му рече Путин на актуелниот претседател на Република Српска, која е под американски и британски санкции поради нејзината сецесионистичка политика и поткопување на Дејтонскиот договор, а со години тој се обидуваше да го компензира ова со одржување блиски врски со Москва, додека, исто така, отворено ја поддржува руската инвазија во Украина.
Путин на Додик му понудил секаква помош, а според видео-снимките од нивната приватна средба може да се заклучи дека разговарале и за состојбите во Босна и Херцеговина, односно на Западен Балкан.
„Знаеме дека ситуацијата во Републиката Српска не е едноставна и подготвени сме да разговараме за ова прашање. Ви благодариме што ги одржувате односите со Русија. Ќе работиме уште понапорно на нашите добри односи и секогаш сте добредојдени во Руската Федерација “, рече Путин.
Додик, пак, му се заблагодарил за средбата, велејќи дека му претставува чест што разговарал со Путин, а додал дека освен со него, има добри односи и со српскиот претседател Александар Вучиќ и со унгарскиот премиер Виктор Орбан.
Се пожали на наводниот притисок врз Република Српска од Запад и вети дека овој ентитет ќе продолжи решително да се спротивставува на воведувањето санкции против Русија, како и на евентуалното влегување во НАТО. „Ниту е логично ниту нормално дека би можеле да го прифатат нашето членство во НАТО“, рекол Додик.
