Русија го повикува Советот за безбедност на ОН да не ја поддржува американската нацрт-резолуција за Блискиот Исток, велејќи дека овој документ не е ништо друго освен дозвола за убивање на палестински цивили, изјави рускиот постојан претставник во ОН Василиј Небензја.
„Алтернативната нацрт-резолуција на Советот за безбедност за Газа предложена од САД не содржи повик за прекин на огнот и има за цел да го прошири чадорот на ОН над израелската операција во енклавата. Ова воопшто не е алтернатива, туку уште една дозвола за убивање палестински цивили. Ги повикуваме членовите на Советот да не го поддржуваат овој деструктивен потфат“, рече тој во својот говор пред Советот за безбедност на ОН.
„Со блокирањето на меѓународните напори за запирање на насилството во Газа, Вашингтон сноси целосна одговорност за невидениот број на цивилни жртви на оваа ескалација, чиј број веќе се приближи до 30.000. Ова е цената на американското вето во Советот на ОН рече тој, додавајќи дека итен прекин на огнот и усогласеноста на Израел со меѓународното хуманитарно право е „единствениот и витален императив за да се спречи масовното гладување во Газа“.
„Сепак, сите обиди на Советот да усвои таква одлука беа блокирани од САД, кои го искористија своето вето четири пати. Наспроти позадината на десетици илјади мртви и гладни луѓе во Газа, американската делегација продолжува цинично да расправа дека прекинот на огнот е опасен бидејќи ќе ја поткопа кревката американска дипломатија на теренот“, истакна дипломатот.
На 20 февруари, САД уште еднаш, во Советот за безбедност на ОН, го блокираа усвојувањето на нацрт-резолуцијата со која се повикува на итен прекин на огнот во Газа. За документот поднесен од Алжир гласаа 13 од 15-те членки на Советот за безбедност, вклучувајќи ги Русија и Кина. Велика Британија се воздржа, а САД ставија вето на резолуцијата.
Советот за безбедност на ОН треба да размисли за воведување санкции против земјите кои го попречуваат хуманитарниот пристап до Појасот Газа, рече Небензја.
„Нотата издадена од Канцеларијата на ОН за координација на хуманитарни прашања во согласност со резолуцијата 2417 на Советот за безбедност (усвоена во 2018 година и со која се осудува употребата на гладување против цивили како метод на војување – ТАСС), не му остава на Советот за безбедност на ОН друг избор освен да продолжи да бара прекин на огнот за да се создадат неопходните услови за работа на хуманитарниот и медицинскиот персонал. Исто така, важно е да не се заборави дека, според одредбите на горенаведената резолуција, Советот за безбедност има право за воведување санкции против оние кои го попречуваат хуманитарниот пристап до оние на кои им е потребна. Сметаме дека сега е време да се активира оваа одредба“, рече тој.
Небензја посочи дека прекинот на огнот „е важен пред сѐ за создавање безбедни, непрекинати хуманитарни коридори“. „Покрај испораката на помош преку нив, неопходно е да се воспостави евакуација на тешко болните луѓе кои во отсуство на третман се соочуваат со непосредна смрт во Газа“, додаде тој.
Финансирање за УНРВА
„Друг шокантен пример е подготвеноста со која голем број западни донатори, уште пред да заврши истрагата, го суспендираа финансирањето на УНРВА среде хуманитарната катастрофа во Појасот Газа, ставајќи ги активностите на агенцијата на работ на колапс. Овој потег Тешко дека може да се гледа како нешто друго освен бесрамна неморална уцена од донатори и политизирање на хуманитарните прашања. Очекуваме дека Советот ќе има можност да разговара за ова прашање посебно во наредните денови“, рече тој на состанокот на Советот за безбедност на ОН.
Кон крајот на јануари, голем број земји, вклучувајќи ги САД, Британија, Германија и Канада, објавија суспензија на финансирањето на УНРВА поради сомневање за врски со радикалното палестинско движење Хамас. Генералниот комесар на УНРВА, Филип Лазарини, нареди отпуштање на неколку вработени во агенцијата, наводно вклучени во нападот на Хамас врз Израел во октомври 2023 година.
Нацрт-резолуцијата на САД
САД претходно подготвија своја нацрт-резолуција за Блискиот Исток. Американскиот документ не повикува на итен прекин на огнот, туку вклучува само параграф во кој се нагласува поддршката за привремен прекин на огнот во Газа „ако е изводливо“, под услов сите заложници да бидат ослободени.
