Три лица загинаа а 12 други се повредени во самоубиствен напад пред банка во градот Кандахар, упориште на талибаните во јужен Авганистан, во четвртокот, изјави за AFP портпаролот на провинцијата.
„Утринава се случи самоубиствен напад пред банка во Кабул, три лица загинаа, а 12 се ранети“, изјавил Инамула Самангани, шеф на Одделот за информации и култура во провинцијата Кандахар.
„Жртвите се цивили“, додал претставникот на локалните власти наведувајќи дека цел на нападот биле луѓе кои дошле да си ги подигнат платите во таа банка.
Нападот се случил во 8 часот по локално време во центарот на големиот град на југот на Авганистан, додека и во оваа муслиманска земја трае светиот месец на постот Рамазан.
Талибанските власти брзо ја опколиле областа и им забраниле на новинарите да прават фотографии и видеа, како што тоа обично го прават. Новинар на AFP извести дека видел како амбулантни возила ги земаат жртвите и ранетите на местото на настанот.
Самангани, кој бил во една од болниците каде што биле примени жртвите, негира дека има итна потреба од крв, спротивно на објавеното на социјалните мрежи.
„Тој проблем не постои. Ранетите не се тешко повредени“, уверува Самангани во пораката до новинарите.
Болниците во Кандахар одбија да соопштат информации за ранетите, велејќи дека им било наредено да не даваат изјави за медиумите. Безбедносните лица и пожарникарите брзо ја расчистиле областа од нападот каде што биле видливи траги од крв, облека, чевли и остатоци.
Бројот на бомбашки напади и самоубиствени напади во Авганистан значително се намали откако талибаните се вратија на власт во август 2021 година и е релативно безбеден. Сепак, бројни вооружени групи, особено џихадистите на Исламската држава, сè уште претставуваат закана.
Од почетокот на Рамазан пред две седмици во Авганистан беа пријавени бројни експлозии, но талибаните потврдија само неколку.
