Француската влада ја подигна тревогата за тероризам на највисоко ниво по терористичкиот масакр крај Москва, изјави во неделата вечерта премиерот Габриел Атал по состанокот на високи претставници за безбедност и одбрана со претседателот Емануел Макрон.
Атал во објава на Х рече дека одлуката, која доаѓа неколку месеци пред Париз да биде домаќин на Летните олимписки играи, е донесена „во заднината на преземањето на одговорноста на Исламската држава за нападот во Москва и заканите што ја притискаат нашата земја“.
Француската тревога за тероризам има три нивоа, при што највисокото ниво се активира пред напад во Франција или во странство кога заканата од напад е неизбежна.
Ова овозможува воведување на вонредни безбедносни мерки како што се зголемени патроли на вооружените сили на јавни места како што се железнички станици, аеродроми и верски објекти.
Во ноември 2017 година во Франција стапи во сила законот против тероризам, кој ја замени вонредната состојба која траеше 719 дена. Со законот против тероризам на полицијата ѝ се даваат поголеми овластувања во спроведувањето истраги, можност за затворање верски објекти и ограничување на движењето на луѓе осомничени дека се поврзани со екстремисти.
Овој закон беше еден од трите ветени закони на претседателот на Франција, Емануел Макрон, во текот на неговата изборна кампања за првиот мандат.
.
