-Она што го слушам и гледам дава одговор на тоа дека Македонија од оваа положба во која денеска се наоѓа, опљачкана, засрамена, понижена, граѓаните насекаде сакаат да ја видат повторна горда. За Македонија да биде повторно горда и повторно ваша, најпрво е потребна огромна победа на 24 април на идниот претседател, професорката Гордана Силјановска Давкова. А, потоа да не биде Македонија само горда, бидејќи е потребно да биде и твоја. А, за тоа да се случи ни е потребна историска двојна победа на 8 мај, порача претседателот на ВМРО-ДПМНЕ, Христијан Мицкоски на денешниот митинг во општина Новаци, во рамките на претседателската кампања.
Тој истакна дека најпрво е потребно да се врати Македонија на тие на кои што им припаѓа, а тоа е народот.
-Потребно е да си ја вратиме државата на тие на кои им припаѓа, а тоа е народот. Народот е единствен суверен во Македонија. За да се случи победа на ВМРО-ДПМНЕ таа треба да биде изразена со мнозинство на пратеници во македонскиот парламент, таа победа треба да биде победа со која ќе се овозможат сите услови да се случи трансформација на Македонија, рече Мицкоски.
Кажа и дека на овие избори има два концепта, а тоа е концептот на Пендаровски и концептот на ВМРО-ДПМНЕ.
-Изборот е јасен, се борат два концепта, едниот е кој што го нуди Стево Пендаровски. Позади овој концепт што го нуди Стево Пендаровски застанаа Али Ахмети, Артан Груби, Бујар Османи, Зечевиќ, Маричиќ и Ковачевски. И другиот концепт е тој што го нуди ВМРО-ДПМНЕ и Твоја Македонија. Кога ќе го слушнете Стево Пендаровски како ви вели дека можеби ништо не сработил изминативе 5 години, ама барем не крадел, тогаш сетете се на сите посети на раководството на СДС во овој објект недалеку од овде, каде што се договорени тендери и зделки со цени двојно па и тројно повисоки од пазарните, а дел од таа разлика ваши пари, наши пари, пари на граѓаните завршуваа во приватни џебови. Дел имаат за цел да ја финансираат криминалната кампања на Стево Пендаровски, потсети претседателот Мицкоски.
На крај претседателот тој порача дека по двојната победа на 8 мај ќе се направи проверка колку Пендаровски и тие околу него се огрешиле пред законот.
-Пендаровски има страв затоа што знае дека за неколку недели од денес, после 8 мај, ќе провериме дали и колку Стево и тие околу него се огрешиле пред законите и ќе провериме дали ја збори вистината дека не крадел, тој и тие околу него кои што тој ги поставил, додаде Мицкоски.