На Волстрит, индексот S&P 500 падна четврти ден по ред во средата, бидејќи корпоративните резултати не беа импресивни и како што станува сè појасно дека американската централна банка нема да ги намали каматните стапки толку брзо како што се очекуваше.
Индексот Dow Jones загуби 0,12 отсто, на 37.753 поени, додека S&P 500 се лизна за 0,58 отсто, на 5.022 поени, а индексот Nasdaq загуби 1,15 отсто, на 15.683 поени.
Индексот S&P 500 паѓа четири дена со ред, па е на пат на загуби трета последователна седмница.
Во претходните пет месеци, најголемата светска берза силно порасна бидејќи инвеститорите очекуваа Fed агресивно да ги намали каматните стапки оваа година, почнувајќи од јуни. Сепак, сѐ појасно е дека американската централна банка нема да брза да ги намали каматните стапки, бидејќи инфлацијата е сè уште висока, а потрошувачката и натаму значително расте.
Во вторникот, претседателот на Fed, Џером Пауел, забележа дека не е постигнат напредок во намалувањето на инфлацијата оваа година и дека монетарната политика може да остане рестриктивна подолг период. Поради ова, пазарот на пари сега проценува дека има само 16 отсто шанси за намалување на каматната стапка на Fed во јуни, а околу 46 отсто во јули.
Под притисок се и индексите поради послабите од очекуваните квартални деловни резултати на компаниите и банките.
„Пазарот се занимава со неколку работи – инфлацијата е повисока од очекуваната, така што каматните стапки би можеле да останат покачени подолго од проценетото. Покрај тоа, се зголемија и геополитичките тензии, особено на Блискиот исток. Сево ова се изговори за трговците да повлечат дел од својот профит од пазарот, по навистина силен раст на цените на акциите за пет месеци“, вели Ентони Саглимбене, стратег во „Ameriprise Financial“.
И на европските берзи цените на акциите вчера пораснаа. Лондонски FTSE индекс зајакна за 0,35 отсто, на 7.847 поени, додека франкфуртски DAX порасна за 0,02 отсто, на 17.770 поени, а париски CAC зајакна за 0,62 отсто, на 7.981 поени.
