Здравствената состојба на словачкиот премиер Роберт Фицо се стабилизира и најлошите стравовувања поминаа, изјави во неделата неговиот заменик Роберт Калинак, но додаде дека засега премиерот нема да биде префрлен од болницата во Банска-Бистрица.
„Веќе не постои непосредна опасност по неговиот живот, но неговата состојба и натаму е сериозна и бара интензивна нега“, рече Калинак.
Можеме да сметаме дека неговата состојба е стабилна, а прогнозата е позитивна. Сите сега се чувствуваме малку поопуштено“, изјави Калинак пред болницата.
Во средата, Фицо беше ранет во атентат по седницата на неговата влада во Хандлова, град во централна Словачка на околу 190 километри од престолнината Братислава.
Миријам Лапуникова, директорка на Универзитетската болница во Банска-Бистрица, каде што беше примен Фицо веднаш по нападот во четвртокот, рече дека премиерот бил подложен на петчасовна операција со два хируршки тима кои лекувале повеќе прострелни рани.
Лапуникова и Калинак во петокот изјавија дека на премиерот му била извршена уште една операција за отстранување на некротичното ткиво од раните.
Словачката полиција обвини 71-годишен маж, противник на суверенистичките политики на Фицо, за обид за убиство.
Пукањето е првиот голем обид за атентат врз европски политички лидер во повеќе од 20 години и предизвика меѓународна осуда, при што политичките аналитичари и пратеници велат дека тоа е показател за сè позагреана и поларизирана политичка клима низ целиот континент.
