Американскиот производител на чипови „Nvidia“ извести за скок на добивките и приходите на почетокот од годината, благодарение на подемот на генеративната вештачка интелигенција.
Во тримесечниот период завршен на 28 април, првиот квартал од фискалната година 2024/2025 во САД, на „Nvidia“ приходите ѝ биле речиси четири пати повисоки отколку во истиот период во 2023/2024 година, скокнувајќи на 26 милијарди долари.
Во бизнисот со центрите за податоци, приходот бил дури пет пати поголем и достигнал 22,6 милијарди долари. Нето добивката била за малку повеќе од седум пати поголема од почетокот на претходната деловна година и изнесувала 14,88 милијарди долари.
Инаку „Nvidia“ започна како производител на графички картички пред да го префрли својот фокус на технологии кои се користат за подучење на апликациите за вештачка интелигенција.
„Започна нова индустриска револуција – компаниите и земјите соработуваат со Nvidia за да ги префрлат традиционалните центри за податоци вредни трилиони долари на компјутери со голема брзина, градејќи нов тип центри за податоци – фабрики за вештачка интелигенција (…)“, – изјави извршниот директор Џен-Хсун „Џенсен“ Хуанг
„Моторот за раст на нашиот бизнис со центри за податоци беше силната побарувачка за генеративна обука за вештачка интелигенција, која продолжува да се забрзува“, додаде Хуанг.
„Покрај давателите на услуги во облак, генеративната вештачка интелигенција се прошири и на компании за потрошувачки и корпоративен интернет, национална вештачка интелигенција, клиенти во автомобилскиот и здравствениот сектор“, истакна шефот на американскиот технолошки гигант.
„Националната вештачка интелигенција“ ја опфаќа, според дефиницијата на веб-страницата на „Nvidia“, физичката и податочната инфраструктура, вклучително и јазичните модели од големи размери развиени од тимови во поединечни земји, обучувајќи ги за достапните податоци за промовирање на инклузивноста на дијалектите, културата и практиката.
