Илјадници луѓе на шпанските Балеарски острови протестираа против масовниот туризам во саботата, во пресрет на летната сезона.
Поворката на демонстрантите се движеше по улиците на Палма де Мајорка, главниот град на најголемиот Балеарски остров. Учествуваа околу 10.000 демонстранти, изјави портпаролот на шпанската полиција. Помал протест со неколку стотици луѓе се одржа во Менорка.
„Сакаме властите да ги спречат луѓето кои не живеат тука повеќе од пет години да купуваат имоти и да воведат поголема контрола на туристичкото сместување“, рече за медиумите Карме Рејнс од колективот што го организираше протестот во Палма де Мајорка.
Агентот за недвижности Хавиер Карбонел рече дека повеќе од половина од недвижностите за изнајмување се користат за туристички цели и не се достапни за локалното население.
„Сакаме помалку масовен туризам а повеќе одржлив туризам“, рече Карбонел.
Во петокот околу илјада луѓе учествуваа на демонстрациите против масовниот туризам на Ибица, еден од најпопуларните балеарски острови.
Илјадници луѓе протестираа во април на Канарските острови, повикувајќи на привремено ограничување на пристигнувањето на туристите за да се запре бумот во изнајмување на туристи и изградба на хотели кои ги зголемуваат трошоците за сместување и домување за локалното население.
По Каталонија, Балеарските острови беа вториот најпопуларен туристички регион во Шпанија минатата година, привлекувајќи 14,4 милиони туристи, објави шпанскиот завод за статистика. Околу 18 милиони туристи ја посетиле Каталонија, а 13,9 милиони ги посетиле Канарските острови во близина на Западна Африка. Туризмот сочинува 45 отсто од бруто домашниот произвдо (БДП) на Балеарите, покажуваат податоците на туристичката организација Exceltur.
