Емануел Макрон ја започна првата државна посета на француски претседател на Германија во последните 24 години со топли зборови за своите домаќини.
– Француско-германските односи се клучни и важни за Европа – рече Макрон на почетокот на неговата тридневна државна посета на Германија.
Тој ја отфрли сугестијата дека односите меѓу двете земји, често опишани како мотор на Европа, почнале да слабеат. По слетувањето во Берлин, Макрон веднаш отпатува во владиниот кварт за да се сретне со претседателот Франк-Валтер Штајнмаер и да присуствува на фестивал на тема демократија.
Штајнмаер му посака добредојде на Макрон и неговата посета ја нарече „доказ за длабочината на француско-германското пријателство“. Тој рече дека и покрај тоа што понекогаш се разликуваат по поединечни политички точки, Берлин и Париз секогаш „постигнуваат договор на крајот“.
„Ако Германија и Франција се обединети, тогаш во Европа се уште може да се постигне многу“, рече тој, пренесе германската агенција ДПА.
Макрон ја истакна и важноста на европските избори во јуни и ја нарече Европската унија бранител на демократијата и заедничките вредности.
Европските избори, за помалку од две недели, и потврдата за важноста на француско-германските односи за придвижување на ЕУ напред ќе бидат во центарот на патувањето што ќе го однесе во различни региони на земјата.
– Мислам дека доживуваме егзистенцијален момент во нашата Европа, бидејќи навистина мислам дека нашата Европа може да умре – рече Емануел Макрон, пренесе француски АФП.
– Постои форма на фасцинација со авторитаризмот што се раѓа во нашите демократии (…) што исто така го храни национализмот и крајностите на нашиот континент. Каква би била оваа Европа доколку со неа владееја националисти во последните години – праша Макрон и одговори дека „немаше да имаме вакцина (…), европски план за закрепнување, капацитет да одговориме на миграциските предизвици во Европа, не би имале Европски зелен договор и капацитет за управување со декарбонизацијата“.
– Би ја напуштиле Украина за да ја поддржиме Русија, која ја поддржуваат сите националисти во нашите земји, и затоа приказната нема да биде иста – тврди францускиот лидер.
Поради сите овие причини, важно е да се гласа за Европејците, заклучи Емануел Макрон, повикувајќи на „борба“ за демократија.
