ВИДЕО| Фицо се обрати првпат по обидот за атентат: Му простувам…

Словачкиот премиер Роберт Фицо за првпат откако беше застрелан во обид за атентат, се обрати кон јавноста.

Тој во 14 минутно видео обраќање рече дека му простил на напаѓачот и најави дека ќе биде подготвен постепено да продолжи со своите должности почнувајќи подоцна во јуни, пренесуваат словачките медиуми.

„Не чувствувам омраза кон странецот што ме застрела. Му простувам и му дозволувам да сфати што направи и зошто го направи тоа“, рече Фицо.

Сепак, најголемиот дел од 14-минутната порака беше посветена на одбрана на неговите ставови и обвинувања против политичките противници, критичките медиуми и невладините организации. Тој рече дека обвинетиот напаѓач не бил „некој лудак“, туку „тој бил само гласник на злото и политичката омраза што политички неуспешната и фрустрирана опозиција ги развила во Словачка“.

„Опозицијата не беше во можност да процени каде нивната агресивна и омраза политика доведе дел од општеството и беше само прашање на време кога ќе се случи трагедија“, рече тој, додавајќи: „Ако продолжи како што е сега, хоророт од 15 мај ќе продолжи и ќе има уште жртви, не се сомневам, ниту за секунда“.

Фицо беше застрелан четири пати од непосредна близина на 15 мај додека ги поздравуваше поддржувачите по состанокот на владата во централниот град Хандлова. Обвинетиот вооружен напаѓач, идентификуван од словачките медиуми како 71-годишниот поет Јурај Цинтула, е обвинет за обид за убиство со умисла и му е одреден притвор.

Фицо беше однесен во болница во блискиот град Банска Бистрица каде што беше подложен на две долги операции и остана во опоравување додека не беше префрлен на домашно лекување на 31 мај.

Фицо дојде на власт минатата година, а претходно беше на чело на владите во 2006-10 и 2012-18 година.

Откако се врати на функцијата минатиот октомври, Фицо даде низа забелешки кои ги влошија врските меѓу Словачка и соседна Украина. Тој го доведе во прашање суверенитетот на Украина и повика на компромис со Русија. Откако беше избран, Словачка престана да испраќа оружје во Украина.

ПОВРЗАНИ НАПИСИПОВЕЌЕ ОД АВТОРОТ