Зголемениот прекуграничен оган на либанското движење Хезболах кон Израел може да предизвика сериозна ескалација, соопшти синоќа израелската војска.
-Зголемената агресија на Хезболах нѐ доведува до раб на она што би можело да биде поширока ескалација, што може да има катастрофални последици за Либан и за целиот регион, изјави портпаролот на израелската војска, контраадмирал Даниел Хагари во видео обраќање на англиски јазик.
Хезболах, кој делува под покровителство на Иран, минатата недела истрела најголем број ракети и беспилотни летала во изминатите девет месеци откога разменува оган со израелската армија, во исто време кога продолжува конфликтот во Газа.
САД и Франција работат на преговори за решение за непријателствата долж јужната граница на Либан. Хезболах соопшти дека нема да престане да пука додека не заврши израелската воена офанзива во Газа.
-Израел ќе ги преземе неопходните мерки за заштита на своите цивили – додека не се врати безбедноста на нашата граница со Либан, рече Хагари.
