Словачка го поддржува предложеното именување на Марк Руте за следен генерален секретар на НАТО, изјави во вторникот словачкиот претседател Петер Пелегрини. Така, Словачка е една од последните земји во алијансата која го поддржа холандскиот премиер во заминување.
Словачка претпочиташе „географски“ поблизок кандидат од Централна и Источна Европа, како што е романскиот претседател Клаус Јоханис, кој, исто така, се кандидираше, но сега го поддржува Руте, рече Пелегрини по самитот на Европската унија во Брисел.
„По завршните разговори со Марк Руте и консултациите со словачката влада, Словачка може да го замисли Марк Руте како шеф на НАТО и ќе го поддржи“, рече Пелегрини во живо во вестите.
САД, Велика Британија, Франција и Германија го поддржуваат Руте да го наследи Јенс Столтенберг, кој ќе се повлече од функцијата лидер на НАТО во октомври по неколкуте продолжувања на неговиот мандат по почетокот на руската инвазија во Украина.
НАТО одлуките ги носи со консензус, така што на секој кандидат му е потребна поддршка од сите 32 сојузници. Со поддршката од Словачка и Унгарија, Руте сега само ја чека поддршката од Романија.
Словачка, која граничи со Украина, ја нагласи потребата следниот шеф на НАТО да помогне во заштитата на воздушниот простор на Словачка, рече Пелегрини, откако претходната словачка влада ѝ го донираше системот „С-300“ на Украина, а сојузниците го повлекоа системот „Patriot“ кој беше привремено стациониран таму.
„Ќе побараме од НАТО да најде систем за противвоздушна одбрана во една од земјите-членки“ што би можел да биде инсталиран во Словачка додека таа земја не добие сопствен систем, рече Пелегрини.
Унгарија, исто така, се откажа од своето противење на Руте, објавија во вторникот холандските медиуми, откако уште минатиот месец премиерот Виктор Орбан ја искажа поддршката за холандскиот политичар. Турција во април им кажа на своите сојузници дека ќе го поддржи Руте.
Романскиот претседател Јоханис во март рече дека се кандидирал за највисокото место во НАТО, тврдејќи дека на нациите од Источна Европа им треба подобра застапеност во евроатлантските лидерски позиции
