Воените авиони Ф-16 кои Вашингтон ги префрли во Киев ќе бидат стационирани на територијата на Украина, објави американскиот советник за национална безбедност Џејк Саливан во интервју за новинската телевизија PBS.
Тој го откри планот откако американскиот и украинскиот претседател, Џо Бајден и Володимир Зеленски, потпишаа десетгодишен билатерален безбедносен договор минатата недела, според кој Вашингтон вети дека ќе продолжи да го поддржува Киев во неговиот конфликт со Москва.
Зеленски по потпишувањето на договорот објави дека САД ѝ ветиле на Украина не само оружје, вклучително и системи за противвоздушна одбрана „Патриот“, туку и борбени авиони Ф-16, како и со други авиони.
САД, Белгија, Данска, Норвешка и Холандија ветија дека ќе ѝ дадат на Украина до 60 авиони Ф-16 до крајот на оваа година. Киев во неколку наврати сугерираше дека овие авиони испорачани од Запад би можеле да бидат стационирани надвор од Украина, на териториите на соседните НАТО земји каде што би биле „безбедни“.
Саливан, сепак, рече дека „планот е авионите Ф-16 да се стационираат во Украина“, додавајќи дека билатералниот безбедносен договор потпишан од Бајден и Зеленски „ја опфаќа оваа точка“.
Во меѓувреме, Москва постојано предупредува дека секое западно оружје испорачано на Украина ќе стане легитимна цел за напад од руските сили и нема да има никакво влијание врз крајниот исход на конфликтот, што ќе доведе само до повеќе крвопролевање.
Претседавачот на Комитетот за одбрана на рускиот парламент, Андреј Картаполов, исто така предупреди дека доколку некој од киевските F-16 е стациониран надвор од Украина и се користи во борбени операции против Русија, тогаш Москва ќе ги смета тие странски бази за „легитимни цели”.
