Најмалку единаесет лица загинаа а десетици други се повредени во пожарот на ниска вегетација што ветрот го прошири во неколку села во југоисточна Турција, одземајќи животи на стотици животни, а Грција, исто така, во петокот се бори со пожарите.
Турскиот министер за здравство Фахретин Коџа објави „единаесет смртни случаи и 78 повредени лица“, од кои пет морале да бидат примени на одделите за интензивна нега. Коџа претходно рече дека има „44 повредени, од кои десет лица во тешка состојба“, во оваа рурална област лоцирана меѓу градовите Дијарбекир и Мардин, во близина на сириската граница.
На социјалните мрежи масовно се споделуваат фотографии од десетици кози, овци и магариња кои лежат во изгорената трева во претежно земјоделскиот и сточарскиот регион.
Според министерот за внатрешни работи Али Јерликаја, пожарот избувнал доцна во четвртокот поради палење на стрништа во област лоцирана на околу триесетина километри јужно од градот Дијарбакир, каде што дневниот термометар се искачува над 40 степени.
Пламените јазици се проширија со ветрот и брзо зафатија пет села. Пожарот е ставен под контрола во текот на ноќта, но службите и во петокот се на терен поради страв од повторно разгорување на пожарот, вели министерот.
И Грција во петокот се бори со неколку шумски пожари во јужниот дел на нејзиното копно, поттикнати од бурните ветрови. Десетици пожарникари со помош на осум авиони беа распоредени во регионите Ахаја и Илија и во близина на градот Краниди на полуостровот Пелопонез. На жителите на неколку села во овие области им било кажано да ги напуштат своите домови.
Шумските пожари се вообичаени во оваа медитеранска земја, но стануваат сѐ поразорни бидејќи летата стануваат потопли и суви.
„Брзината на ветерот често надминува 95 километри на час, што го спречува леталото да се приближи“, рече портпаролот на грчката противпожарна бригада Василис Ватракоганис на брифинг со новинарите.
„Сите сили за цивилна заштита денеска се во подготвеност“, додаде тој, бидејќи за неколку часа во земјата избувнаа околу 45 шумски пожари.
Друг шумски пожар што накратко им се закануваше на домовите во крајбрежен град во близина на Атина беше ставен под контрола претходно во петокот, соопштија пожарникарите.
