Унгарскиот министер за надворешни работи и трговија Петер Сијарто ги критикуваше обидите на Европската унија да ѝ забрани на неговата земја да има контакти со Москва со цел да се реши конфликтот во Украина и рече дека неговата земја ги отфрла таквите политики.
„Ова не само што е неприфатливо, туку е и скандал кога, во 21 век, една земја е стигматизирана само затоа што фаворизира решение преку преговори и ги користи своите канали за комуникација со страните, кои не се согласуваат за клучните прашања“, рече тој на дискусијата на Советот за безбедност на ОН, коментирајќи ги последните критики на унгарскиот премиер Виктор Орбан за неговите напори ориентирани кон мир во однос на Украина.
За време на неговата 10-дневна мировна мисија, унгарскиот премиер на 2 јули во Киев разговараше со украинскиот претседател Володимир Зеленски, а три дена подоцна во Москва се сретна со рускиот претседател Владимир Путин. Потоа го посети Пекинг на средба со кинескиот лидер Кси Џинпинг и отиде во Вашингтон каде што разговараше со турскиот претседател Реџеп Таип Ердоган на маргините на самитот на НАТО. Подоцна, тој отпатува за Флорида на средба со поранешниот американски претседател Доналд Трамп со кој разговарал и за начините за решавање на украинската криза.
Неговите посети на Москва и Пекинг предизвикаа отворени критики во Брисел, каде европските лидери рекоа дека иако земјата претседава со Советот на Европската унија, тие не ѝ дадоа на Унгарија овластувања да преговара од страна на целата европска заедница.
Унгарската влада одговори дека Орбан ја претставувал сопствената земја за време на овие посети, а неговата мировна мисија ќе продолжи и покрај критиките.
