Израелските сили гаѓале и погодиле училиште во населбата Шуџаија во градот Газа, убивајќи најмалку 15 лица и ранувајќи уште 29 други, соопшти во четвртокот палестинската цивилна служба за итни случаи, додека борбите продолжуваат во разните делови на Појасот Газа.
Израелската војска во соопштението тврди дека ги гаѓала милитантите коишто, според неа, дејствувале од комплексот на територијата на училиштето. Се тврди дека тој комплекс наводно бил користен како засолниште за командантите и борците на Хамас.
„Пред нападот преземени се бројни чекори за да се намали ризикот од повредување цивили, вклучително и користење прецизна муниција, надгледување и дополнителни разузнавачки сознанија“, се тврди во армиското соопштение.
Израелската армија во објавата не дава никакви информации за жртви, и повторно го обвини Хамас дека намерно дејствува од цивилната инфраструктура. Хамас негира дека ги користи цивилните објекти, како болници и училишта, за воени цели.
