Британскиот премиер Кир Стармер во вторникот објави дека можеби ќе треба да воведе „болни“ повисоки даноци за богатите како дел од неговиот план за реформирање на Обединетото Кралство и ослободување од проблемите создадени за време на 14-годишното владеење на конзервативците.
Стармер, чија Лабуристичка партија извојува убедлива победа на изборите во јули, вети дека ќе ја врати суштината на британското општество, велејќи дека антиимигрантските протести овој месец ги истакнаа растечките поделби поттикнати од тенденцијата на конзервативците да се свртат кон популизам наместо кон решавање на проблемите.
„Ќе бидам искрен со вас. Има буџет што доаѓа во октомври и ќе биде болно. Немаме избор со оглед на ситуацијата во која се наоѓаме“, рече Стармер.
Меѓутоа, додаде дека владата планира да го одржи ветувањето од предизборната кампања дека нема да ги зголеми одредени даноци за работниците. Стармер, исто така, предупреди дека за секоја промена ќе биде потребно одредено време.
Рече и дека е подготвен да носи непопуларни одлуки, вклучително и дека „оние со најшироки рамења“ треба да очекуваат да го сносат најголемиот дел од буџетот од 30 октомври, нарекувајќи го „краткорочна болка за долгорочно добро“.
„Ние наследивме не само економска црна дупка, туку и социјална црна дупка, и затоа мораме да направиме нешто и да ги направиме работите поинакви. Дел од тоа е да бидеме искрени со луѓето за изборите со кои се соочуваме и колку е тешко ова Искрено, работите ќе се влошат пред да се подобриме“, најави тој.
Зборувајќи пред публиката со која се сретна за време на овогодинешната изборна кампања, вклучувајќи чираци, наставници, медицински сестри и сопственици на мали бизниси, Стармер рече дека е решен да ја обнови довербата во владата и да ги поправи темелите на земјата.
Во својот мандат тој наследи економија со бавен раст, која дури сега почнува да покажува знаци на закрепнување. Нето долгот на јавниот сектор е на највисоко ниво од 1960-те, додека даночното оптоварување е на пат да го достигне највисокото ниво во речиси 80 години. Министерката за финансии Рејчел Ривс рече дека јавните финансии се на пат до дефицит од 22 милијарди фунти, поради што мора да се намалат трошоците.