Европските берзи благо пораснаа во средата во претпладневното тргување, враќајќи дел од вчерашните загуби, во претпазливото тргување додека инвеститорите очекуваат вести кои би можеле да ги насочат пазарите.
Индексот STOXX 600 на водечките европски акции во првиот дневен пресек од тргувањето беше во плус 0,2 отсто, по вчерашниот пад. Истовремено, лондонскиот FTSE индекс зајакна за 0,41 отсто, на 8.224 поени, додека франкфуртски DAX се зголеми за 0,05 отсто, на 19.076 поени, а париски CAC за 0,07 отсто, на 7.526 поени.
И повеќето азиски берзи тргуваат претпазливо. MSCI индексот на азиско-пацифичките акции, без јапонските, во истиот момент од тргувањето како и во Европа порасна за 0,4 отсто. Истовремено, јапонскиот индекс Nikkei зајакна за 0,8 отсто, додека цените на акциите во Австралија пораснаа за 0,1 отсто. Во Јужна Кореја поради празникот нема работа, а во Хонгконг и Шангај индексите паднаа меѓу 0,8 и 6,6 отсто.
По силен раст со денови, благодарение на воведувањето на најголемите економски стимулативни мерки од пандемијата, кинеските берзи претпладнево остро паднаа. Тоа е резултат на повлекувањето на дел од заработката од пазарот, по силен раст на цените, но и придушување на оптимизмот, бидејќи ќе треба многу време мерките да имаат влијание врз економијата.
На другите берзи во регионот цените на акциите пораснаа бидејќи инвеститорите беа охрабрени од вчерашниот раст на њујоршки Волстрит.
