Вицепремиерот и министер за транспорт, Александар Николоски денеска во Велес, коментирајќи ја вчерашната изјава на шефицата на германската дипломатија Аналена Бербок, која рече дека уставните измени се клучен чекор кон почетокот на преговорите на Северна Македонија со ЕУ, истакна дека позицијата на Владата е јасна, директна и отворена, а тоа е дека нема уставни измени под бугарски диктат и оти единствен начин тоа да се реши е да се даде гаранција дека нема да има натамошни блокади од ваков тип.
– Уставни измени под бугарски диктат нема да има и дека единствен начин ова да се реши е да добиеме гаранција дека ова нема да ни се повторува на секои шест месеци, Македонија да се соочува со пок и да имаме нови и нови вета. Еден од начините ние го предложивме – тоа е одложено важење на уставните измени, кои би влегле во сила со денот на ратификација на протоколот за членство на Македонија во ЕУ од страна на бугарскиот Парламент. Доколку навистина Бугарија сака Македонија да влезе во ЕУ не гледам што им прават разлика три години затоа што, нели, сите велат дека сме подготвени и дека за три години ќе ги завршиме преговорите, рече Николоски одговараќи на новинарски прашања.
Тој нагласи дека ако земјава ги почне преговорите оваа есен, тие ќе бидат завршени наесен во 2027 година, а потоа, како што рече, може да се ратификува договорот за членство во бугарскиот Парламент.
– Не гледам што е разликата за бугарската влада, доколку се искрени, дали уставните измени ќе се случат во 2024 или во 2027 година. Секако веќе две години се поминати од тој штетен Француски предлог, така што на чисто ги вадиме бугарските политичари со овој наш предлог. Тој предлог наидува на многу симпатии и разбирање во многу главни градови на ЕУ и останува во следниот период да завршат изборите во Бугарија и да видиме каква ќе биде позицијата на новата бугарска влада, а во овој момент тоа е тоа што можам да го кажам, нагласи Николоски.
На новинарски коментар дека не се добива впечаток дека овој предлог наишол на симпатии во Берлин, Николоски рече дека тој не мисли така.
– Јас немам таков впечаток. Според изјавата на министерката, тоа што го кажа е дека во моментов точно има прифатено Француски предлог од претходната влада, предлогот е лош, но тоа е прифатено, но дали ние го прифаќаме тоа како Влада – не го прифаќаме и затоа нема уставни измени под бугарски диктат, дополни Николоски.
Шефицата на германската дипломатија Аналена Бербок вчера по средбата со македонскиот министер за надворешни работи и надворешна трговија Тимчо Муцунски во Берлин, изјави дека таа се залага за укинување на едногласност во ЕУ, но додека тоа не се случи, Северна Македонија мора да ги почитува компромисите, пренесе Дојче веле.
– Вметнувањето на бугарското малцинство во вашиот Устав е последниот чекор за отворање на првиот преговарачки кластер со ЕУ, порача Бербок по средбата со Муцунски, која се случи еден ден по самитот на Берлинскиот процес, на кој лидерите на земјите од Западниот Балкан се согласија на неколку договори кои треба да ја подобрат соработката во делот на економијата и образованието.
На прес-конференцијата по средбата со Муцунски, Бербок зборуваше за уставните измени како клучен чекор кон почетокот на преговорите со ЕУ, иако и самата потенцираше дека се залага за укинување на принципот на едногласност во ЕУ, особено во делот на проширувањето. Таа се надева дека може да се случи пробив на тој план по парламентарните избори во Бугарија на крајот на месецов. Според неа, во случајот на Северна Македонија не станува збор за неправда, туку за почитување на правилата на ЕУ.
