Русија го повика Меѓународниот монетарен фонд (ММФ – IMF) „објективно да го анализира“ влијанието на санкциите врз меѓународниот монетарен систем, истакнувајќи дека ги поддржува повиците за ограничување на „зачестените еднострани ограничувања во трговијата и инвестициите“, пренесува руската новинска агенција ТАСС.
„Ги поддржуваме повиците (на ММФ) за зачувување на мултилатерализмот, зауздување на зачестените еднострани ограничувања на трговијата и инвестициите, како и напорите на фондот да ги процени економските последици од фрагментацијата на трговијата“, ја цитира ТАСС изјавата на министерот Антон Силуанов во изјавата споделена кон крајот на минатата седмица на состанокот на Меѓународниот монетарен фонд и Финансискиот комитет (IMFC) во Вашингтон.
„Исто така, го повикуваме ММФ да спроведе темелна и објективна анализа и проценка на влијанието на финансиските ограничувања и санкции врз меѓународниот монетарен систем“, се вели во соопштението.
Руската економија продолжува да бележи високи стапки на раст и покрај притисокот од санкциите без преседан во историјата и ги надминува повеќето прогнози, вклучително и оние на ММФ, посочи Силуанов.
„Годинава очекуваме економски раст со стапка од 3,9 проценти“, се наведува во соопштението.
Во своите редовни есенски прогнози, ММФ процени дека руската економија годинава ќе порасне за 3,6 отсто. Во 2025 година, растот треба нагло да забави, до проценета стапка од 1,3 отсто. Но според некои проценки, руската економија според обемот веќе ја надминала четвртата свветска економија на Јапонија, која продолжено се соочува со потреси во финансиската сфера.
Минатата седмица Силуанов, исто така, предупреди дека Русија е подготвена да возврати на употребата на замрзнатите руски средства од Западот со истата мерка.
„Ако западните земји почнат да ги користат приходите од замрзнатите златни и девизни резерви на Руската Федерација, ние апсолутно ќе го сториме истото. Имаме замрзнати пари на непријателски компании, организации и исто така апсолутно ги чуваме на нашите сметки и ќе искористете ги приходите од користење на такви средства, такви ресурси на сличен начин“, изјави рускиот министер за финансии за телевизијата Россия 24.
„Ќе ги насочиме кон потребите на економијата, кон потребите на регионите на Руската Федерација“, додаде Силуанов.
Според него, таквите одлуки веќе се спроведуваат, јави ТАСС.
Минатата седмица Европскиот парламент одобри вонреден заем за Украина од 35 милијарди евра, кој треба да се финансира со средствата од замрзнатите руски средства, како дел од пакетот на групата Г7 (САД, Велика Британија, Герамнија, Франција, Италија, Канада и Јапонија, во чија работа посебно е застапена и ЕУ) со вкупна вредност од околу 45 милијарди евра.
„Предлог-законот за воспоставување на таканаречениот ‘механизам за соработка во кредитирањето на Украина’, кој беше усвоен од Европскиот парламент, не е ништо повеќе од незаконски обид да се создаде маска на законитоста за кражба на имотот на Руската Федерација“, нагласи вршителот на должноста претставник на Русија во ЕУ, Кирил Логвинов, кого го цитираше ТАСС.
„ЕУ свесно врши економски криминал на глобално ниво“, рече руски дипломат, предупредувајќи дека со претворањето на санкциите во инструмент на надворешната политика, Брисел го предизвикува меѓународниот финансиски систем и му задава удар на еврото како резервна валута.
Околу 70 отсто од вредноста на руските средства се депонирани во белгиската клириншка куќа „Euroclear“, која поседува еквивалент од 190 милијарди евра во хартии од вредност и готовина во сопственост на руската централна банка. Станува збор за финансиска институција со седиште во Брисел чијашто челничка уште во февруари годинава предупреди дека таквите акции, како што беше прелагано да се конфискуваат замрзнатите рудски средства, би ја поткопале довербата во западните и глобалните финансиски институции, како и дека би било заобиколување на меѓународното право.
Рускиот заменик-министер за финансии Иван Чебесков минатата седмица предупреди дека употребата на замрзнати руски средства ќе има тешки последици за меѓународниот монетарен и финансиски систем.
„Американскиот долар сѐ повеќе се користи како оружје, што го потсетува светот на ризиците поврзани со трансакциите во американската валута. Се разбира, земјите во развој бараат други валути за извршување трансакции и резерви“, рече Чебесков алудирајќи на золемената размена меѓу големите економии во развој во национални валути.
