Денеска во 11 часот и 52 минути Нови Сад ќе застане. А, со него треба и остатокот од Србија. Поминаа точно 14 дена откако се урна настрешницата на новореконструираната Железничка станица и однесе 14 животи, додека тројца тешко повредени се уште се бор за живот. Новосадската опозиција ги повика своите сограѓани да застанат точно во наведеното време, на симболични 14 минути. Сите. Во спомен на жртвите и двонеделниот срам на оваа власт. Од друга страна, активисти повикуваат на блокада на раскрсницата кај зградата на Железничката станица во недела напладне. За трагедијата во Нови Сад се уште нема приведени. Јавноста не знае кој е одговорен.
Претседателот Александар Вучиќ и премиерот Милош Вучевиќ секојдневно најавуваат нови оставки во Владата, но нема, пишува Нова.рс. Оние чии имиња се поврзуваат со терминот „политичка одговорност“ се сокриле во глувчешка дупка. Меѓу нив е и министерот Томислав Момировиќ, кој пред Горан Весиќ раководеше со Секторот за градежништво. Единственото нешто што го прави Момировиќ во последните 14 дена е откажување од присуство на настани на кои се најавуваше и се криеше од очите на јавност, пишува српскиот медиум.
Во исто време, на пример, зад решетки се најдоа советникот во Градското собрание Миша Бачулов, активистот Иван Бијелиќ, поранешниот претседател на општина Инџија Горан Јешиќ и младиот човек кој го бранеше Реља Стојановиќ…
Поради сето наведено, новосадската опозиција повикува на нов протест.
„Излези од колата, напуштете ја наставата, прогласете пауза…
„Цел Нови Сад нека застане барем на тие 14 минути. Ако си во кола, застани, запали светла и излези од колата, ако си на работа, излези од зградата во која работиш и излези на улица во тоа време, ако си на факултет,напуштете го часот и вратете се подоцна, нека ги поминат учениците тие 14 минути во училишниот двор, нека прогласат пауза лекарите во тој момент, приватните претприемачи исто. Сите во тоа време треба само да застанат, бидејќи животите на тие 14 луѓе застанаа во секунда“, се наведува во соопштението на новосадската опозиција, истакнувајќи дека власта се обидува да заборави на жртвите од трагедијата во овој град и да избегне одговорност.
Пратеникот и поранешен градоначалник на Нови Сад, Борислав Новаковиќ рече дека ова е форма на граѓанска непослушност и бунт.
„Прво, затоа што тоа е гест на солидарност кон семејствата на оние кои ги загубија своите најблиски, и второ, тоа е гест на протест и би рекол 14 минути предупредување до властите, кои по 14 дена ниту се уапсени, ниту осомничени“, истакна Новаковиќ за Н1 и додаде дека трагедијата во Нови Сад можела да се случи на кое било друго место, бидејќи „цела Србија е под настрешницата“.
Само два дена подоцна, во недела на 17 ноември, во Нови Сад ќе се организира блокада на раскрсницата пред железничката станица.
