Во седиштето на Европскиот парламент во Брисел, претседателот на Собранието на Република Македонија, Африм Гаши, денеска се сретна со претседателката на Европскиот парламент, Роберта Мецола. На оваа функција Мецола беше реизбрана со големо мнозинство на гласови по конституирањето на новиот состав на Европскиот парламент во јуни оваа година, информира собраниската прес-служба.
Гаши се заблагодарил за силната поддршка на европската перспектива на нашата земја која во континуитет ја дава Европскиот парламент и особено претседателката Мецола и изразил очекување таа да продолжи сѐ до полноправното членство на земјата во ЕУ.
Двајцата соговорници се согласиле дека граѓаните на Република Македонија очекуваат големи поместувања бидејќи беа направени навистина отстапки од наша страна кои доведоа до членство во НАТО, но не и до започнување на Меѓувладина конференција со ЕУ.
Претседателката Мецола најавила посета на регионот на Западен Балкан за почетокот на следната година и се заложи и за конкретни активности на економски план, на градење на инфраструктурата, укинувањето на роамингот, но и поконкретни исчекори за РС Македонија преку Програмата за демократска поддршка, насочена првенствено за Парламентот.
-Главни столбови на оваа Програма ќе бидат законодавството и транспарентноста, кои би се одвивале преку студиски посети и тренинзи за медијација, за што претседателот Гаши ја изрази својата поддршка и подготвеност да создаде потребни предуслови за нејзина реализација, велат од Собранието.
Соговорниците се согласиле за големиот бенефит за земјата и граѓаните за јасната визија која ЕУ ја има во процесот на евроинтергацијата, но и за јасните пораки кои треба ЕУ да ги испорача и застане зад нив, а земјата да го задржи фокусот кон евроинтегративниот пат со сочувано достоинство и задоволни граѓани, независно од нивното етничко потекло.
