Бразилскиот претседател Луис Инасио Лула да Силва го отвори самитот на 20-те најголеми економии во светот (Г-20) во понеделникот со покренување на глобален пакт за борба против сиромаштијата и гладта што повеќе од 80 земји одлучија да го поддржат.
Челниците на земјите од Г-20 се сретнаа во Музејот на модерна уметност во Рио де Жанеиро на дводневни разговори, а нивната агенда подвлече дека ќе има промена во глобалниот поредок со враќањето на новоизбраниот американски претседател Доналд Трамп на власт. Разговорите за трговијата, климатските промени и меѓународната безбедност ќе се соочат со противење на острите промени во политиката на САД кога Трамп ќе ја преземе функцијата во јануари, од царините до ветувања дека ќе преговара за решение на војната во Украина, пишува Reuters.
Во својот воведен говор, Лула рече дека разорните ефекти од климатските промени може да се видат низ целиот свет, повикувајќи ги челниците да преземат акција за справување со глобалното затоплување и сиромаштијата.
Глобалната алијанса за борба против гладот и сиромаштијата е водечка иницијатива на бразилскиот претседател Луис Инасио Лула да Силва. Тоа вклучува придонес на земјите и меѓународните организации за забрзување на борбата против овие општествени феномени до 2030 година.
Пактот што тој го започна, а кој треба да се занимава со искоренување на гладот и сиромаштијата, е поддржан од Африка, Европската унија, Русија, меѓународни организации, развојни банки и филантропски организации како што се Фондацијата Рокфелер и Фондацијата Бил и Мелинда Гејтс.
„Гладот и сиромаштијата не се резултат на недости или природен феномен. Производ се на политичките одлуки. Во свет каде што се произведуваат речиси шест милијарди тони храна годишно, тоа е неприфатливо“, рече Лула, кој е роден во сиромаштија и влезе во политиката организирајќи синдикат на металци.
Рускиот претседател Владимир Путин не присуствува на самитот, како што беше објаснето за да не му создава непријатноси на домаќинот кој е сојузник во блокот БРИКС, а Москва ја претставува министерот за надворешни работи Сергеј Лавров, како земја која стана важен фактор во извозот на храна, во прв ред житарки.
Шефот на руската делегација ја поддржал иницијативата на Бразил за создавањето Глобална алијанса за борба против гладот и сиромаштијата
„(Лавров) зборуваше за напорите на нашата земја да обезбеди безбедност на храната во земјите во развој, што се одрази на значајниот придонес на БРИКС во решавањето на глобалните развојни проблеми; резултатите од самитот во Казан го привлекоа вниманието на неоколонијалните практики на колективниот Запад, што го отежнува воспоставувањето вистинска рамноправна меѓународна соработка“, изјави за новинарите Марија Захарова, портпаролката на руското Министерство за надворешни работи.
Нови приоритети на Белата куќа
И додека америакнскиот претседател Џо Бајден ќе се приклучи како претседател во заминување со уште само два месеца престој во Белата куќа, кинескиот претседател Кси Џинпинг ќе биде централен играч на самитот на Г20 исполнет со геополитички тензии поради војните во Газа и Украина.
Кси најави мерки за поддршка за „глобалниот југ“ и рече дека Кина ќе го поддржи развојот на „висококвалитетната“ иницијатива „Појас и пат“, клучна стратегија за надворешна политика која ги насочува големите инвестиции на Кина во инфраструктурни проекти во земјите во развој.
Бразилските власти претпоставуваат дека нивната агенда на Г-20, фокусирана на одржливиот развој, оданочувањето на ултра богатите и борбата против сиромаштијата и гладот, наскоро би можело да го изгуби импулсот бидејќи Трамп почнува да диктира нови глобални приоритети од Белата куќа. Иницијативата на Бразил за глобално управување, вклучително и мултилатералните институции, исто така, може да удри во ѕид со Трамп, изјавиле за Reuters претставници на бразилските власти.
Бајден треба да објави ветување за повторно полнење на фондот на Меѓународната асоцијација за развој на Светска банка, со која секоаш претседава Американец, наменет за најсиромашните земји во светот и да започне билатерално партнерство за чиста енергија со Бразил, изјави за новинарите висок американски функционер.
Трговските разговори на маргините на Г20 ќе бидат исполнети со загриженост за ескалација на трговска војна меѓу САД и Кина, со оглед на плановите на Трамп да воведе царини за увоз од Кина и други земји.
Политиката на Трамп за намалување на даноците ќе се судри и со напорите на Бразил да отвори дијалог за оданочување на супербогатите, прашање блиско до бразилскиот претседател Лула, кој го стави на агендата на Г20.
Најновиот сојузник на Трамп во Латинска Америка, неолибертаријанскиот аргентински претседател Хавиер Милеи, поранешен комичар и забавувач, веќе се изјасни против ова прашање, а аргентинските претставници рекле дека одбиле да ја споменат точката во заедничката изјава на самитот, рекле за Reuters неименувани дипломати.