Јапонските производители на автомобили „Honda“ и „Nissan“, наводно, преговараат за можно спојување во обид да ја зајакнат конкуренцијата во секторот за електрични автомобили, се вели во медиумски извештај објавен во средата.
Спојувањето, кое ќе го вклучи и „Mitsubishi Motors“, ќе ги направи компаниите поконкурентни против „Tesla“ и кинеските производители на електрични возила, објави азискиот огранок на деловниот весник Nikkei.
Спојувањето ќе ја создаде третата по големина автомобилска компанија во светот со продажба од повеќе од осум милиони возила, што ќе ја доближи до јапонскиот конкурент „Toyotа“ и германскиот „Volkswagen“.
Цената на акцијата на „Nissan“, најголемиот акционер на „Mitsubishi Motors“, остро порасна по објавувањето на плановите за спојување со „Honda“.
Во март, јапонските производители објавија дека ќе работат заедно на развој на електрични возила и софтверски технологии за намалување на трошоците и подобрување на конкурентноста.
