Синоќа во НБА лигата се одиграа три натпревара и на трите славеа гостите, а најнеизвесен беше оној во Њу Орлеанс, каде Денвер Нагетс ги победија домашните Пеликанс со 132:129 по продолжението.
Никола Јокиќ со „трипл-дабл“ учинок го предводеше Денвер, а иако беше без погодоци по втората четвртина, натпреварот го заврши со 27 поени, 13 скока и 10 асистенции. Тоа е негов веќе 11-ти „трипл-дабл“ оваа сезона. Џамал Мареј исто така постигна 27, а Расел Вестбрук 21 коша .
Кај Пеликанс најдобар беше Џордан Хокинс со 25 поени, а СиЏеј МекКолум додаде 24 поени.
Јокиќ ги постигна првите три поена на Нагетс во продолжението, а потоа асистираше за кошот на Гордон за изедначувањето пред Џамал Мареј да додаде полагање. Потоа Њу Орлеанс двапати пријдоа на два поена заостанување, но не можеа поблиску.
Хјустон Рокетс, исто така, на гостински терен ги победија Торонто Репторс со 114:110 за кои ова е седми последователен пораз.
Дилон Брукс постигна 27 поени, Џејлен Грин додаде 22, а Алперен Сенгун имаше 17 поени, 10 скока и пет асистенции за Хјустон, за кои ова е втората победа во низа.
Торонто ги предводеше Ја’Коби Валтер со рекордот на кариерата од 27 поени.
Индијана Пејсерс ги победија Сакраменто Кингс со 122:95. Паскал Сијакам го предводеше нападот на Индијана со 19 поени и 10 скока, а Тајрис Халибартон, кој играше во Сакраменто по вторпат откако се пресели од Кингс во Пејсерс во февруари 2022 година, додаде 14 поени, осум асистенции и пет скока.
Де’Арон Фокс беше најдобар стрелец на натпреварот со 23 поени за Кингс, кои погодија само 36,5 отсто од шутевите. Додаде и седум асистенции. Домантас Сабонис, кој отиде од Индијана во Сакраменто во трејдот на Халибартон со шест играчи, имаше рекордни во кариерата 21 скок и 17 поени.
