Фудбалерите на Ливерпул го совладаа Лестер со 3:1 на својот „Енфилд“ во натпреварот од 18. коло на англиската Премиер лига, зголемувајќи ја предноста на врвот на табелата.
Со натпревар помалку, Ливерпул има седум бода повеќе од Челзи и осум повеќе од Нотингем Форест. Лестер е во опасната зона, на 18. место на табелата.
Лестер поведе во шестата минута со голот на Џордан Ају, но најдобриот тим во Премиер лигата продолжи да доминира до крајот. Најпрво рамката од голот во два наврата ги спасуваше гостите, по ударите на Робертсон и Салах, а Ливерпул сепак успеа да израмни пред паузата. Во судиското надополнување, Гакпо прецизно го погоди спротивниот агол со ударн од врвот на шеснаесетникот за 1:1.
Ливерпул поведе веќе на почетокот на вториот дел кога во 49. минута Џонс ја затресе мрежата за 2:1. Сѐ беше решено во 82. минута, а ниту овој меч не можеше да помине без гол на Мохамед Салах, кој беше стрелец за конечни 3:1.
Фудбалерите на Вулверхемптон ја постигнаа четвртата првенствена победа сезонава, откако домаќините го совладаа Манчестер Јунајтед со 2:0. Во првиот дел од натпреварот Вулверхемптон имаше подобри шанси, но не успеа да го дочека со предност одморот. Новиот поттик за домашните дојде во 47. минута кога гостинскиот играч Бруно Фернандеш доби втор жолт картон.
Со играч повеќе домашните го постигнаа првиот гол во 59. минута, а директно од корнер погоди Матеус Куња. Беше 1:0 до 99. минута кога на Хванг несебично му асистираше Куња и ги зголеми 2:0 на стадионот „Молино“.
Вулверхемптон се искачи на 17. место на табелата, додека Манчестер Јунајтед остана четиринаесетти.
На клупата на Саутемптон дебитираше 49-годишниот хрватски тренер Иван Јуриќ кој на домашен терен беше поразен од Вест Хем со 0:1. Иако Саутемптон беше подобар до примениот гол, не успеа да реализира ниту една шанса и на крајот го забележа 14. лигашки пораз сезонава. Новиот тим на Јуриќ и натаму е убедливо последен на табелата а најблискиот Ипсвич има шест бода повеќе. Голот вреден три бода за Вест Хем постигна Бовен во 59. минута.
Челзи изненадувачки остана со празни раце на домашниот меч против Фулам кој на „Стемфорд Бриџ“ победи со 2:1. Палмер во 16. минута го доведе Челзи во водство од 1:0, а домаќините водеа до 82. минута. На крајот дојде до целосен пресврт, а стрелци за Фулам беа Вилсон во 82. минута и Муниз во 95. минута.
Њукасл пред своите гледачи ја победи Астон Вила со 3:0. Веќе во втората минута Њукасл поведе со голот на Гордон, додека во 32. минута Астон Вила остана со играч помалку поради исклучувањето на Дуран. Њукасл создаде бројни можности до крајот на натпреварот и можеше да ја наполни мрежата на противникот до врв, но реализираа само Исак во 59. минута и Џоелинтон во 91. минута.
Бурнемаут и Кристал Палас ремизираа без голови, додека Нотингем Форест го победи Тотенхем со 1:0 и скокна на третото место на табелата. Единствениот стрелец беше Еланга во 28. минута.
Во првиот натпревар од 18. коло Манчестер Сити уште еднаш остана без победа, играјќи 1:1 против Евертон на својот „Етихад“. Бернардо Силва ги доведе во водство „Граѓаните“ во 14., но израмни за гостите Ндиаје во 36. минута.
Во петок се играат последните два натпревара од ова коло Брајтон – Брентфорд и Арсенал – Ипсвич.
